29 сакавіка, Мінск /Кар. БЕЛТА/. Футбалісты зборных Беларусі правядуць сёння таварыскія матчы, паведамляе карэспандэнт БЕЛТА.
Нацыянальная каманда пад кіраўніцтвам Георгія Кандрацьева ў другім кантрольным паядынку на вучэбна-трэніровачным зборы ў Бахрэйне сустрэнецца са зборнай гэтай краіны. У першым матчы новага сезона беларускія футбалісты разграмілі каманду Індыі з лікам 3:0. У другім тайме гэтай сустрэчы галы забілі Арцём Быкаў, Андрэй Салавей і Валерый Грамыка. Зборная Бахрэйна абыграла індыйцаў з рэзультатам 2:1, а потым узяла верх над футбалістамі Бурундзі - 1:0. Сапернікі беларусаў па групавым этапе Лігі нацый УЕФА сёння таксама правядуць кантрольныя сустрэчы. Зборная Славакіі ў іспанскай Мурсіі згуляе з камандай Фінляндыі. Каманда Азербайджана ў мальтыйскім Та-Калі сустрэнецца з футбалістамі Латвіі. Разам з беларусамі, славакамі і азербайджанцамі ў 3-й групе лігі С Лігі нацый згуляе пераможца двухматчавага процістаяння Малдова - Казахстан. На мінулым тыдні ў Кішынёве з лікам 2:1 перамаглі казахстанскія футбалісты, а сёння гэтыя сапернікі сустрэнуцца ў Нур-Султане.
Маладзёжная зборная Беларусі (U-21) сёння згуляе ў Баку супраць азербайджанскіх равеснікаў. На мінулым тыдні падапечныя Сяргея Ясінскага паспяхова правялі адборачны паядынак маладзёжнага чэмпіянату Еўропы, атрымаўшы перамогу на выездзе над футбалістамі Кіпра з мінімальнай перавагай у ліку - 1:0. Пераможны мяч забіў Раман Вягера. Сёння кіпрыёты прымуць на сваім полі ісландцаў. Яшчэ ў адным матчы кваліфікацыйнай групы D грэкі згуляюць у сябе дома з партугальцамі. Турнірнае становішча ў гэтай групе цяпер такое: Грэцыя - 17 ачкоў (7 матчаў), Партугалія - 16 (6), Беларусь - 9 (7), Ісландыя - 8 (6), Кіпр - 7 (6), Ліхтэнштэйн - 0 (8). Непасрэдна ў фінальную стадыю маладзёжнага Еўра-2023 трапяць пераможцы дзевяці кваліфікацыйных груп, а таксама лепшая з каманд, якія фінішуюць другімі. Астатнія восем зборных, якія зоймуць другія месцы, правядуць паядынкі плэй-оф за чатыры пуцёўкі ў фінал.
Фінальная частка маладзёжнага кантынентальнага першынства з удзелам 16 лепшых каманд пройдзе на арэнах Грузіі і Румыніі, футбалісты якіх вызвалены ад адборачнага этапу.-0-
