3 верасня, Мінск /Кар. БЕЛТА/. Футбалісты маладзёжнай зборнай Беларусі (U-21) з паражэння пачалі выступленне ў адборачным турніры кантынентальнага першынства 2023 года, паведамляе карэспандэнт БЕЛТА.
2 верасня ў Брэсце падапечныя Сяргея Ясінскага ў першым паядынку кваліфікацыйнай групы D прайгралі камандзе Ісландыі з лікам 1:2. Галявы дубль у складзе гасцей аформіў Хакон Харальдсан, які вызначыўся на 20-й і 54-й хвілінах, а мяч у адказ на 70-й хвіліне забіў Аляксандр Шасцюк.
Пасля гэтай гульні беларускія футбалісты адправяцца на гасцявую сустрэчу з адным з галоўных фаварытаў турніру камандай Партугаліі, якая адбудзецца 6 верасня ў горадзе Амадора. У гэтай групе ўжо адбыліся два матчы. У першым з іх футбалісты Грэцыі ў Афінах разышліся мірам з кіпрыётамі - 0:0, а потым грэкі разграмілі ў гасцях каманду Ліхтэнштэйна з лікам 5:0.
Напрамую ў фінальную стадыю маладзёжнага Еўра-2023 трапяць пераможцы дзевяці адборачных груп, а таксама лепшая з каманд, якія фінішуюць другімі. Астатнія 8 зборных, якія зоймуць другія месцы, правядуць паядынкі плэй-оф за 4 пуцёўкі ў фінал. Фінальная частка маладзёжнага кантынентальнага першынства з удзелам 16 лепшых каманд пройдзе на арэнах Грузіі і Румыніі, футбалісты якіх вызвалены ад адборачнага этапу.-0-
