13 кастрычніка, Мінск /Кар. БЕЛТА/. Футбалісты маладзёжнай зборнай Беларусі (U-21) перамаглі ў матчы адборачнага раўнда чэмпіянату Еўропы ў сваёй узроставай групе равеснікаў з Ліхтэнштэйна - 6:0, паведамляе карэспандэнт БЕЛТА.
Матч праходзіў з перавагай беларускай дружыны, якая ўжо да заканчэння першага тайма зняла практычна ўсе пытанні аб пераможцы. На 15-й мінуце матчу Уладзіслаў Марозаў адкрыў лік. Праз 14 мінут лік падвоіў Яраслаў Арашкевіч, а ў дабаўлены час першай палавіны матчу трэцяе ўзяцце варот сапернікаў аформіў Аляксандр Шасцюк.
На гэтым падапечныя Сяргея Ясінскага не спыніліся і ў другім тайме яшчэ тройчы прымусілі каманду Ліхтэнштэйна пачынаць з сярэдзіны поля. Аўтарамі галоў сталі Уладзіслаў Марозаў, які вызначыўся другі раз за гульню, а таксама Віктар Сотнікаў і Алег Нікіфарэнка.
Пасля гэтага паядынку турнірнае становішча ў групе D, дзе гуляюць беларусы, такое: Партугалія - 9 ачкоў (3 гульні), Грэцыя - 8 (4), Кіпр - 7 (3), Ісландыя - 4 (3), Беларусь - 3 (4), Ліхтэнштэйн - 0 (5).-0-