Футбалісты "Маладзечна" прымуць "Нёман" у перанесеным матчы чэмпіянату Беларусі
 

10 верасня, Мінск /Кар. БЕЛТА/. Гродзенскі "Нёман" пасля выступлення ў Лізе канферэнцый УЕФА і двухмесячнага перапынку вяртаецца ў чэмпіянат Беларусі, паведамляе карэспандэнт БЕЛТА.

Сёння ў перанесеным матчы 16-га тура нацыянальнага першынства падапечныя Ігара Кавалевіча згуляюць у гасцях у аўтсайдараў турніру футбалістаў "Маладзечна" (пачатак сустрэчы ў 17.00, прамая трансляцыя на тэлеканале "Беларусь 5"). У гульні першага круга гродзенская каманда разграміла сённяшніх сапернікаў у сябе дома з сухім лікам 3:0. Свой папярэдні паядынак чэмпіянату краіны "Нёман" правёў 4 ліпеня, перамогшы на сваёй арэне "Іслач" з Мінскага раёна - 2:0. Маладзечанскі клуб 29 жніўня спыніў зацяжную серыю паражэнняў, адолеўшы на выездзе футбалістаў "Віцебска" з рэзультатам 1:0. У 15 праведзеных сустрэчах "Нёман" набраў 28 ачкоў і займае 8-е месца, у "Маладзечна" ўсяго 7 заліковых балаў пасля 19 гульняў і апошняя, 16-я пазіцыя ў турнірнай табліцы.

Становішча ў лідзіруючай групе: "МЛ Віцебск" - 52 ачкі (20 матчаў), "Славія" (Мазыр) - 41 (20), "Дынама" (Мінск) - 36 (18), "Тарпеда-БелАЗ" - 34 (19). Бамбардзірскую гонку ўзначальвае нападаючы "Іслачы" Аляксандр Шасцюк, у актыве якога 15 забітых мячоў.-0-