3 лютага, Мінск /Кар. БЕЛТА/. Футбалісты брэсцкага "Дынама" завяршылі першы перадсезонны збор у Турцыі нічыёй з самарскімі "Крыламі Саветаў" - 1:1, паведамляе карэспандэнт БЕЛТА.
У гульні з прадстаўніком расійскай прэм'ер-лігі чэмпіёны Беларусі выйшлі наперад ужо на 4-й мінуце, калі Арцём Мілеўскі замкнуў флангавую перадачу Міхаіла Гардзейчука. Брастаўчане лідзіравалі амаль да канца паядынку, але ўтрымаць перамогу не змаглі - за 3 мінуты да фінальнага свістка харвацкі легіянер самарскага клуба Дзеян Раданіч зраўнаваў лік. На гэтым турэцкім зборы падапечныя Сяргея Кавальчука перамаглі славацкі "Слован" з Браціславы (1:0), згулялі ўнічыю з украінскім "Марыупалем" (2:2) і прайгралі кіеўскаму "Дынама" (0:3).
Сярэбраны прызёр чэмпіянату Беларусі барысаўскі БАТЭ ў першым кантрольным матчы збору ў турэцкім Белеку разышоўся мірам з чэшскім клубам "Фастаў" са Зліна - 0:0. Чарговыя спарынгі каманда Кірыла Альшэўскага правядзе 7 лютага: раніцай сустрэча з расійскім "Сочы", а ўвечары паядынак з яшчэ адным прадстаўніком Чэхіі "Пршыбрамам". У заключным матчы барысаўчане згуляюць з кіеўскім "Дынама".
Уладальнік бронзавых медалёў салігорскі "Шахцёр" перамог грозненскі "Ахмат" з лікам 3:1 (галы - Аляксандр Булычоў, Георгій Дыясамідзэ, Дарка Бодул). Да гэтага "гарнякі" перамаглі сербскі "Спартак" з Субаціцы - 2:0, а затым з аналагічным рэзультатам уступілі польскаму "Пясту" з горада Глівіцы. На 4 лютага ў падапечных Юрыя Вернідуба запланаваны спарынг з баснійскім клубам "Вележ" з Мостара.
Футбалісты мінскага "Дынама" на фінішы збору ў Сочы разграмілі мясцовы клуб "Медык" з лікам 6:2, а раней уступілі прадстаўніку другога дывізіёна расійскага чэмпіянату курскаму "Авангарду" - 2:4. Дынамаўцы вярнуліся дадому і правядуць два спарынгі ў Мінску - 8 лютага супраць "Віцебска" і 11 лютага супраць бабруйскай "Белшыны". Затым мінчане адправяцца на збор у турэцкі Белек, дзе плануюць правесці пяць кантрольных паядынкаў: 15 лютага з эстонскай "Левадыяй" з Таліна, 21 лютага з расійскім "Дынама" з Масквы, 22 лютага з лідарам расійскай прэм'ер-лігі "Зенітам" з Санкт-Пецярбурга, 29 лютага з клубам другога дывізіёна ўкраінскага чэмпіянату "Валынью" з Луцка, 1 сакавіка з латвійскім "Спартаком" з Юрмалы.
У фінальным матчы турніру "Белазавец-2020" у Жодзіне футбалісты "Слуцка" перамаглі "Смалявічы" - 3:1, у гульні за 3-е месца гродзенскі "Нёман" перамог "Віцебск" у серыі пасляматчавых пенальці - 5:4 (асноўны час - 0:0), у матчы за 5-е падагульняючае месца "Іслач" з рэзультатам 3:2 перамагла жодзінскае "Тарпеда-БелАЗ".-0-
