12 студзеня, Мінск /Кар. БЕЛТА/. Футбалісты брэсцкага "Дынама" ў наступным сезоне будуць змагацца за высокія месцы ў чэмпіянаце. Аб гэтым заявіў на спецыяльнай прэс-канферэнцыі новы галоўны трэнер брэсцкага "Дынама" Радаслаў Латал, перадае карэспандэнт БЕЛТА.
"У бліжэйшыя два месяцы лепш пазнаёмлюся з камандай. Наша задача відавочная - футбалісты брэсцкага "Дынама" ў наступным сезоне будуць змагацца за самыя высокія месцы і ў чэмпіянаце, і ў Кубку Беларусі. Ужо 15 студзеня каманда пачне трэніравацца, пасля чаго клуб паедзе на збор у Турцыю, дзе 28 студзеня згуляе першы спарынг сезона з "Црвенай Зоркай" з Бялграда", - расказаў Радаслаў Латал.
"Кандыдатаў на пасаду было нямала, але ў клубе сышліся на думцы, што чэшскі спецыяліст зможа вывесці клуб на новы ўзровень. Тых мэт, якія паставілі ў мінулым годзе, каманда не дасягнула. З прыходам новых спецыялістаў у мяне ёсць упэўненасць, што задачы на сезон будуць выкананы", - адзначыў генеральны менеджар брастаўчан Вальдас Іванаўскас.
Чэшскі трэнер Радаслаў Латал у студзені змяніў на пасадзе галоўнага трэнера брэсцкага "Дынама" беларуса Уладзіміра Жураўля. Дапамагаць новаму настаўніку ў беларускай камандзе будзе суайчыннік Марцэл Лічка. Пасля сустрэчы са СМІ адбылося падпісанне кантрактаў з трэнерамі дынамаўцаў.
Вальдас Іванаўскас таксама адзначыў, што ў трэнерскім штабе "Дынама" яшчэ з'явяцца новыя імёны. Пастараюцца брастаўчане заваяваць права ўдзелу ў наступным сезоне і ў еўракубках.
У 2017-м дынамаўцы выступілі ў 2-м кваліфікацыйным раўндзе Лігі Еўропы і ўступілі па суме двух матчаў аўстрыйскаму "Альтаху" (1:1, 0:3).
У мінулым чэмпіянаце брастаўчане занялі чацвёртае месца і выйгралі Кубак Беларусі.-0-
Фота ФК "Дынама-Брэст".
