21 студзеня, Мінск /Кар. БЕЛТА/. Чэмпіёны Беларусі футбалісты барысаўскага БАТЭ правядуць тры кантрольныя матчы на першым перадсезонным зборы, які пройдзе з 24 студзеня па 7 лютага ў турэцкім Белеку, паведамілі БЕЛТА ў прэс-службе клуба.
У першым спарынгу каманда Аляксея Багі 29 студзеня сустрэнецца з клубам "Сувон Самсунг Блюуінгз" з Рэспублікі Карэя, на 3 лютага назначана сустрэча з аўстрыйскім "Вольфсбергерам", на 6 лютага гульня з сербскай "Вайводзінай" з Нові Сада.
Сярэбраныя прызёры беларускага першынства футбалісты салігорскага "Шахцёра" ўжо адкрылі гульнявую праграму на зборы ў Турцыі. У першым трэніровачным паядынку падапечныя Сяргея Ташуева ўступілі венгерскаму "Уйпешту" з Будапешта з лікам 2:6. У складзе прайграўшых вызначыліся ветэран Мікалай Януш і навабранец салігорскага клуба Уладзімір Хвашчынскі. На 25 студзеня запланавана гульня з харвацкім "Хайдукам" са Спліта, на 30 студзеня - з балгарскай "Вітошай" і чэшскім клубам "Славацка".
Брэсцкае "Дынама", якое на 6-м месцы ў чэмпіянаце Беларусі, свой першы трэніровачны збор правядзе ў Аб'яднаных Арабскіх Эміратах з 26 студзеня па 9 лютага. Брастаўчане плануюць праверыць свае сілы ў трох спарынгах: 30 студзеня - з "Аль-Джазірай" (Абу-Дабі, ААЭ), 1 лютага - з кітайскім "Гуанчжоу Эвергранд", 8 лютага - з кітайскім "Шанхаем СІПГ". У складзе шанхайскага клуба выступае нямала вядомых легіянераў. Сярод іх бразільцы - форвард Халк, які доўгі час гуляў у піцерскім "Зеніце", а таксама паўабаронца Оскар, які правёў некалькі сезонаў у лонданскім "Чэлсі".-0-
