26 снежня, Мінск /Кар. БЕЛТА/. Вырашальны этап 26-га розыгрышу Кубка Беларусі па баскетболе сярод мужчынскіх каманд "Фінал чатырох" пройдзе ў Магілёве, паведамляе карэспандэнт БЕЛТА.
У сераду, 28 снежня, у першым паўфінальным матчы на паркеце магілёўскага спарткомплексу "Алімпіец" сустрэнуцца баскетбалісты "Гродна-93" і віцебскага "Рубона". Затым цяперашні ўладальнік трафея БК "МІНСК" згуляе з магілёўскім "Барысфенам". Пераможцы паўфінальных баталій 29 снежня паспрачаюцца за Кубак краіны, а тыя, хто прайграў, вызначаць уладальніка бронзавых узнагарод. Уваход на ўсе матчы свабодны. У вырашальным кубкавым паядынку мінулага сезона "МІНСК" упэўнена перамог "Гродна-93" з вынікам 81:49 і 13-ы раз заваяваў Кубак. У гульні за бронзу "Барысфен" узяў верх над "Рубонам" з лікам 87:66.
У нядаўнім фінальным матчы жаночага кубкавага турніру баскетбалісткі "Гарызонта", якія прадстаўляюць Мінскую вобласць, перамаглі гродзенскую "Алімпію" з перавагай усяго два ачкі - 74:72. У паядынку за бронзавыя ўзнагароды БК "Мінск" упэўнена абыграў "Гомельскіх рысяў" - 90:62.-0-
