13 мая, Мінск /Кар. БЕЛТА/. Фінальная серыя за залатыя медалі мужчынскага чэмпіянату Беларусі па баскетболе стартуе ў пачатку наступнага тыдня ў Мінску, паведамляе карэспандэнт БЕЛТА.
Два першыя паядынкі серыі да трох перамог паміж дзеючымі чэмпіёнамі краіны баскетбалістамі "Цмокі-Мінск" і магілёўскім "Барысфенам" пройдуць 17 і 18 мая на арэне сталічнага "Фалькон клуба". Потым, 22 мая, сапернікі сустрэнуцца ў магілёўскім спарткомплексе "Алімпіец". Калі пасля трох гульняў пераможца не вызначыцца, то чацвёрты матч 23 мая таксама пройдзе ў Магілёве. Калі лік у серыі будзе роўным, то пяты, вырашальны, паядынак за чэмпіёнскі тытул адбудзецца 26 мая ў Мінску. На шляху да фіналу сталічныя "драконы" тройчы ўпэўнена абыгралі мінскі "Імпульс-БДУІР" - 92:65, 101:42 і 96:62. Баскетбалісты "Барысфена" ў паўфінале таксама атрымалі тры вікторыі над "Гродна-93" - 87:77, 100:69 і 83:71. Няўдачнікі паўфінальных баталій правядуць серыю за бронзавыя ўзнагароды. Два стартавыя паядынкі адбудуцца ў Гродне 15 і 16 мая, трэцяя сустрэча пройдзе 21 мая ў Мінску.
Мінскія "Цмокі" 12 разоў станавіліся чэмпіёнамі Беларусі, восем тытулаў у "Гродна-93", сталічны "Віталюр" чатыры разы браў золата, мінскі РТІ тройчы ўзнімаўся на вышэйшую прыступку п'едэстала гонару, адзін раз першынствавалі баскетбалісты РДВАР.-0-
