27 красавіка, Мінск /Кар. БЕЛТА/. У розыгрышы Кубка Беларусі па футболе сёння вызначацца ўдзельнікі фінальнага паядынку, паведамляе карэспандэнт БЕЛТА.
Футбалісты "Віцебска" пасля паражэння ў гасцявым паўфінале ад "Гомеля" паспрабуюць узяць рэванш у дамашнім паўфінальным паядынку. На сваёй арэне гамяльчане выйгралі з лікам 2:0, забіўшы па мячы ў кожным тайме: у канцы першай палавіны гульні вызначыўся Кірыл Ермаковіч, а ў хуткім часе пасля перапынку яго поспех паўтарыў Ілья Алексіевіч. На папярэдняй стадыі кубкавага турніру гомельскія футбалісты выбілі з розыгрышу мінскае "Дынама" - 1:1 (у гасцях) і 3:1 (дома), віцебская дружына пакінула за бортам брэсцкае "Дынама" - 2:0 (дома) і 0:1 (у гасцях).
У другой сённяшняй сустрэчы цяперашні ўладальнік Кубка краіны барысаўскі БАТЭ прыме гасцей з "Нёмана". У іх першым матчы ў Гродне барысаўчане ўступілі з рэзультатам 1:2. У складзе пераможцаў вызначыліся Павел Савіцкі і Гегам Кадзімян, у гасцей мяч забіў Неманья Міліч. У чвэрцьфінале барысаўчане па суме дзвюх сустрэч былі мацнейшыя за жодзінскае "Тарпеда-БелАЗа" - 1:1 (дома) і 1:0 (у гасцях), а іх апаненты прайшлі магілёўскі "Днепр" - 3:0 (дома) і 0:0 (у гасцях).
Вырашальны паядынак 31-га розыгрышу Кубка Беларусі адбудзецца 21 мая на полі мінскага стадыёна "Дынама".
У фінальным матчы мінулага сезона футбалісты БАТЭ заваявалі свой пяты трафей, перамогшы ў Гомелі "Іслач" з Мінскага раёна з лікам 2:1. Па тры разы Кубкам валодалі мінскае "Дынама", "Шахцёр", бабруйская "Белшына" і брэсцкае "Дынама". Па два трафеі ў сталічнага МТЗ-РІПА, "Гомеля", мазырскай "Славіі" і наваполацкага "Нафтана", па адным - у футбалістаў "Мінска", сталічнага "Дынама-93", гродзенскага "Нёмана", "Віцебска" і "Тарпеда-БелАЗа".-0-
