22 чэрвеня, Мінск /Кар. БЕЛТА/. Электронная сістэма Hawk-Eye заменіць лінейных суддзяў на матчах адкрытага чэмпіянату ЗША па тэнісе. Аб гэтым і шэрагу іншых новаўвядзенняў аб'явілі арганізатары US Open-2020, паведамляе карэспандэнт БЕЛТА.
Плануецца, што сістэма "ястрабінае вока" заменіць рэальных арбітраў не на ўсіх кортах. На галоўных арэнах адкрытага чэмпіянату ЗША - імя Артура Эша і Луі Армстранга - лінейныя суддзі будуць працаваць па-ранейшаму. Яшчэ адно змяненне закране болбояў - замест дзяцей, якія падаюць мячы, будуць працаваць дарослыя. Таксама аб'яўлена, што маючы адбыцца турнір у Нью-Ёрку пройдзе без кваліфікацыйных раўндаў і са скарочанай парнай праграмай - па 32 дуэты ў жанчын і мужчын. У адзіночным разрадзе, як і раней, выступяць па 128 спартсменаў у жанчын і мужчын. Па 120 ігракоў пройдуць згодна з рэйтынгам на 16 сакавіка, яшчэ па 8 удзельнікаў атрымаюць wild card ад арганізатараў. Нізкарэйтынгавым удзельнікам, якія маглі прабіцца ў асноўную сетку праз кваліфікацыю, будзе выплачана кампенсацыя. Такім чынам, з прадстаўнікоў Беларусі ў другім у гэтым сезоне турніры серыі "Вялікага шлема" ў адзіночным разрадзе могуць прыняць удзел Арына Сабаленка (11-ы нумар рэйтынгу WTA), Вікторыя Азаранка (58), Аляксандра Сасновіч (119) і Ягор Герасімаў (69-ы нумар рэйтынгу АТР).
На гэты раз на US Open не будзе змешаных парных спаборніцтваў, юніёрскіх турніраў, спаборніцтваў калясачнікаў, а таксама тэнісных зорак мінулых гадоў. Адкрыты чэмпіянат ЗША пройдзе ў Нью-Ёрку з 31 жніўня па 13 верасня без прысутнасці гледачоў.
Што датычыцца наступнага турніру серыі "Вялікага шлема" - адкрытага чэмпіянату Францыі ў Парыжы, то яго арганізатары паведамілі, што турніру без гледачоў дакладна не будзе. Аднак пакуль невядома, колькі балельшчыкаў дапусцяць на трыбуны кортаў "Ралан Гарос", канчатковае рашэнне па гэтым пытанні прымуць пазней сумесна з дзяржаўнымі органамі. Французскае першынство намечана правесці з 21 верасня па 11 кастрычніка.-0-
