13 чэрвеня, Мінск /Кар. БЕЛТА/. Дзяржава клапоціцца аб здароўі нацыі. Такое меркаванне карэспандэнту БЕЛТА выказаў беларускі самбіст, шматразовы чэмпіён і прызёр сусветных і кантынентальных форумаў Андрэй Казусёнак.
"У Беларусі заўсёды вітаўся і папулярызаваўся здаровы лад жыцця. Дзяржава ўсяляк падтрымлівае і прапагандуе спорт. І гэта вельмі правільна. Я таксама падтрымліваю такую палітыку і па магчымасці ўдзельнічаю ў мерапрыемствах: перадаю вопыт, матывую на заняткі фізкультурай і спортам. Мне хочацца, каб як мага больш людзей пачыналі займацца спортам, а атлеты перадавалі свой вопыт. З кожным годам павялічваецца колькасць масавых мерапрыемстваў для дзяцей і дарослых. Павялічваецца і колькасць тых, хто займаецца спортам. Гэта ўсё сведчыць аб тым, што дзяржава клапоціцца аб здароўі нацыі", - сказаў Андрэй Казусёнак.
Цяпер знакаміты спартсмен трэніруецца і рыхтуецца да прадаўжэння спаборніцкага сезона. У рабоце Андрэй Казусёнак асаблівую ўвагу ўдзяляе скорасна-сілавым якасцям, кросам і дыхальным практыкаванням. Настрой на чэмпіянат Еўропы ў самбіста баявы. Паводле яго слоў, ён хоча як мага хутчэй выступіць і даказаць, што пасля доўгага перапынку не страціў майстэрства.
У планах у Андрэя Казусёнка таксама ўдзел у спаборніцтвах па грэплінгу. "Я сябрую з алімпійскім чэмпіёнам 2008 года японскім дзюдаістам Сатосі Ісіі, які выступае ў грэплінгу. Ён запрашае мяне на розныя старты. Думаю, у бліжэйшы час удасца паспаборнічаць і ў гэтым відзе спорту. Для мяне гэта выдатная магчымасць зацвердзіцца ў новым відзе барацьбы і ўзяць нешта новае для сябе", - дадаў спартсмен.-0-
