11 лістапада, Мінск /Кар. БЕЛТА/. Серб Новак Джокавіч атрымаў перамогу ў першым матчы падагульняючага турніру Асацыяцыі тэнісістаў-прафесіяналаў (АТР), што стартаваў у Лондане, паведамляе карэспандэнт БЕЛТА.
У паядынку з італьянскім тэнісістам Матэа Берэціні, які займае 8-е месца ў сусветным рэйтынгу, Новак Джокавіч, у якога другая пазіцыя, аддаў саперніку ўсяго 3 геймы - 6:2, 6:1.
У другім матчы папярэдняй групы Б'ёрна Борга аўстрыец Дамінік Цім (5-ы нумар рэйтынгу АТР) перайграў у двух сэтах швейцарца Роджэра Федэрэра (3) - 7:5, 7:5.
Сёння матчы першага тура правядуць прадстаўнікі квартэта Андрэ Агасі. Першая ракетка планеты іспанец Рафаэль Надаль будзе гуляць з пераможцам мінулага падагульняючага турніру прадстаўніком Германіі Аляксандрам Зверавым, які знаходзіцца на 7-м радку сусветнага рэйтынгу. Сапернікам расійскага тэнісіста Данііла Мядзведзева (4) будзе грэк Стэфанас Цыцыпас (6).
Пасля завяршэння групавога этапу ў паўфінал выйдуць па два лепшыя тэнісісты з кожнага квартэта.
Агульны прызавы фонд падагульняючага турніру АТР-2019 складае $9 млн, ён завершыцца 17 лістапада. У вырашальным паядынку падагульняючага турніру мінулага года Аляксандр Звераў перамог Новака Джокавіча - 6:4, 6:3.-0-