9 студзеня, Мінск /Кар. БЕЛТА/. Дзесяць беларускіх спартсменаў могуць увайсці ў склад каманды Еўропы на лёгкаатлетычным матчы з ЗША, які 9-10 верасня пройдзе ў Мінску. Аб гэтым паведаміў сёння на прэс-канферэнцыі старшыня БФЛА Вадзім Дзевятоўскі, перадае карэспандэнт БЕЛТА.
"Для прымаючага боку важны ўдзел беларускіх атлетаў у складзе еўрапейскай каманды. Мяркуючы па выніках мінулага сезона, такія атлеты, як скакун у вышыню Максім Недасекаў, Таццяна Халадовіч, нашы бягухі Аліна Талай, Эльвіра Герман, Марына Арзамасава, павінны ўвайсці ў склад зборнай Еўропы. Разлічваем на ўдзел дзесяці беларускіх спартсменаў", - сказаў Вадзім Дзевятоўскі.
"Нацыянальная федэрацыя поўнасцю ў падрыхтоўцы матчу падтрымліваецца кіраўніцтвам Мінспорту. Няма ніякіх сумненняў, што маючыя адбыцца спаборніцтвы стануць аднымі з самых запамінальных для спартсменаў і балельшчыкаў. Многія мае калегі з іншых федэрацый па-добраму нам зайздросцяць і пытаюцца, як удалося атрымаць гэты матч? Вядома, гэта рэзультат карпатлівай работы БФЛА сумесна з Еўрапейскай лёгкаатлетычнай асацыяцыяй. Без сумесных намаганняў нам складана было б прывезці ў Мінск такую прадстаўнічую дэлегацыю", - падкрэсліў Вадзім Дзевятоўскі.
Адна з вядучых беларускіх бягух - чэмпіёнка Еўропы ў бегу на 100 м з бар'ерамі Эльвіра Герман сёння адзначае дзень нараджэння, але прыйшла на прэс-канферэнцыю і расказала, як будзе рыхтавацца да маючага адбыцца сезона і матчу. "Планы ўжо складзены. Спадзяёмся з трэнерам толькі прыбаўляць у рэзультатах. Вельмі хачу трапіць у зборную Еўропы ў бар'ерным бегу. Колькасць месцаў абмежавана, а канкурэнцыя сур'ёзная. Для мяне будзе вялікі гонар выступіць у верасні на "Дынама" і паказаць высокі рэзультат у процістаянні з лепшымі амерыканскімі бягухамі", - дадала Эльвіра Герман.
Адным з лідараў у скачках у вышыню ў Еўропе з'яўляецца беларус Максім Недасекаў, які не хавае свайго жадання апынуцца ў еўрапейскай камандзе. "Сезон чакаецца няпросты. Шмат важных стартаў, на якіх галоўнае абысціся без траўмаў. Калі па рэзультатах адбяруся ў склад еўрапейскай дружыны на матчы з ЗША, то на "Дынама" пастараюся паказаць свае лепшыя скачкі", - адзначыў ён.
Паводле слоў намесніка старшыні Мінгарвыканкама Ігара Юркевіча, Мінск стане адной са спартыўных сталіц Еўропы ў 2019 годзе. "У бягучым годзе сталіца Беларусі будзе прымаць нямала спартыўных форумаў самага высокага ўзроўню: чэмпіянат Еўропы па фігурным катанні, II Еўрапейскія гульні, Мінскі паўмарафон, а матчавая сустрэча Еўропа - ЗША ў Мінску абяцае стаць гістарычнай не толькі для нашай краіны, але і для ўсёй сусветнай лёгкай атлетыкі. Горад будзе гатовы правесці гэтыя важныя спартыўныя падзеі, мы маем дастатковы вопыт у арганізацыі такіх мерапрыемстваў", - падкрэсліў Ігар Юркевіч.
Лёгкаатлетычны матч Еўропа-ЗША пройдзе 9-10 верасня 2019 года на мінскім стадыёне "Дынама" і збярэ лепшых спартсменаў Старога Свету і Злучаных Штатаў Амерыкі. Усяго ў старце плануюць прыняць удзел каля 300 лёгкаатлетаў.-0-
