11 лістапада, Мінск /Кар. БЕЛТА/. Дырэктар спаборніцтваў FIS па скачках на лыжах з трампліна Сандра Перціле з 8 па 10 лістапада наведаў Беларусь, паведамілі БЕЛТА ў НАК.
Сандра Перціле правёў нарады з кіраўніцтвам НАК Беларусі, Міністэрства спорту і турызму, Беларускага лыжнага саюза, на якіх абмяркоўваліся пытанні развіцця скачкоў на лыжах з трампліна і адпаведнай інфраструктуры ў нашай краіне.
Дырэктар FIS наведаў спартыўны комплекс "Раўбічы", азнаёміўся з яго інфраструктурай і далейшымі планамі па развіцці, пабываў на трэніроўцы юных беларускіх лятаючых лыжнікаў і паразмаўляў з трэнерскім складам. "У Беларусі вялікая ўвага ўдзяляецца дзіцячаму спорту. Скачкі на лыжах з трампліна - адзін з самых папулярных зімовых відаў. Я бачу вялікі ўзаемны патэнцыял. FIS будзе і ў далейшым аказваць усебаковую дапамогу і прыкладзе максімум намаганняў для развіцця скачкоў на лыжах з трампліна ў вашай краіне. Мяне асабліва ўразілі "Раўбічы", гэта комплекс з вялікім патэнцыялам для развіцця", - сказаў Сандра Перціле.
Ён таксама станоўча ацаніў выставачную экспазіцыю НАК Беларусі, у якой прадстаўлены галоўныя дасягненні беларускага спорту, падкрэсліўшы, што за кароткі перыяд суверэннай гісторыі Беларусі ўдалося дасягнуць высокіх спартыўных рэзультатаў на міжнароднай арэне.
Па выніках візіту дасягнута дамоўленасць аб прадаўжэнні работы з каротка- і доўгатэрміновымі дарожнымі картамі па развіцці скачкоў на лыжах з трампліна ў Беларусі, падтрыманні ўзаемных кантактаў, кансультацый і сустрэч.-0-
