Дынамаўскае дэрбі ў плэй-оф Кубка Гагарына стартуе 2 сакавіка, Мінск прыме матчы 6 і 8 сакавіка

27 лютага, Мінск /Кар. БЕЛТА/. Сталі вядомы даты правядзення матчаў першага раўнда плэй-оф розыгрышу Кубка Гагарына ў Кантынентальнай хакейнай лізе, паведамляе БЕЛТА са спасылкай на прэс-службу КХЛ.

Мінскаму "Дынама", які заняў восьмае месца на Захадзе, у сапернікі выпалі маскоўскія аднаклубнікі, якія сталі пераможцамі рэгулярнага чэмпіянату. Першапачаткова дынамаўскае дэрбі ў чвэрцьфінале Заходняй канферэнцыі павінна было стартаваць 1 сакавіка, аднак з-за занятасці маскоўскай "ВТБ-Арэны" 3 сакавіка і "Мінск-Арэны" 5 сакавіка тэрміны серыі былі перанесены на дзень. Такім чынам, першая гульня процістаяння стартуе ў Маскве ў 17.00, другая - там жа ў 19.30. Трэці і чацвёрты матчы серыі пройдуць у Мінску 6 сакавіка (19.10) і 8 сакавіка (17.10). Пры неабходнасці пяты паядынак адбудзецца ў Маскве 10 сакавіка, шосты - у Мінску 12 сакавіка, сёмы - у сталіцы Расіі 14 сакавіка.

Плэй-оф Кубка Гагарына пачнецца 29 лютага ў парах "Лакаматыў" - ЦСКА, "Спартак" - "Поўначсталь", "Салават Юлаеў" - Трактар" і "Ак Барс" - "Аўтамабіліст". У першы дзень вясны высвятляць адносіны пачнуць СКА і "Тарпеда", "Металург" і "Амур", а таксама "Авангард" і "Лада".-0-