7 красавіка, Мінск /Кар. БЕЛТА/. Матчы чэмпіянату свету па хакеі ў Рызе, які пройдзе з 21 мая па 6 чэрвеня, рассудзяць два беларускія суддзі. Такая інфармацыя змешчана на афіцыйным сайце Федэрацыі хакея Беларусі, паведамляе БЕЛТА.
Беларусь на планетарным форуме будуць прадстаўляць галоўны суддзя Максім Сідарэнка і лайнсмен Дзмітрый Галяк. Усяго на турніры будуць працаваць 18 галоўных суддзяў і 18 лінейных. Усе арбітры будуць падзелены на шэсць груп па шэсць чалавек (тры галоўныя і тры лінейныя). У гэтых групах яны будуць працаваць на матчах і трэніравацца.
"Такі падыход звязаны з асаблівымі абставінамі з-за COVID-19. Мы лічым, што гэта можа павысіць узровень судзейства дзякуючы лепшай каардынацыі паміж арбітрамі і адзінай лініяй судзейства", - адзначыў старшыня судзейскага камітэта ІІХФ і член савета ІІХФ Сяргей Ганчароў.-0-
