Фота з архіва Belarusian Federation of Modern Pentathlon
1 лютага, Мінск /Кар. БЕЛТА/. У Гомелі прадаўжаецца Кубак краіны па сучасным пяцібор’і з удзелам мацнейшых беларускіх спартсменаў, паведамляе карэспандэнт БЕЛТА.
Паўфінальныя спаборніцтвы прайшлі 30 і 31 студзеня, сёння адбыўся фінал індывідуальнага турніру ў жанчын, у якім прынялі ўдзел 17 спартсменак. Золата Кубка ў родным горадзе заваявала Вольга Сілкіна - чэмпіёнка свету 2019 года стала мацнейшай у фехтаванні, паказала другі час у плаванні і набрала максімальны бал у канкуры, пасля чаго ўтрымала першае месца ў лазер-ране.
Другой да фінішу камбінаванага віду прыйшла яшчэ адна прадстаўніца Гомельшчыны Віялета Гурэева, бронзу выйграла Кацярына Сукора з Мінска. Мінулагодняя пераможца Кубка Ірына Прасянцова на гэты раз стала чацвёртай, алімпійская медалістка Настасся Пракапенка - шостая. Трохразовая чэмпіёнка II Гульняў краін СНД Марыя Гнедчык атрымала нулявую ацэнку ў канкуры і ў выніку аказалася толькі 11-й. Заўтра медалі асабістага турніру разыграюць мужчыны.
Кубак Беларусі ў Гомелі з’яўляецца адным з этапаў падрыхтоўкі лідараў нашай каманды да вяртання на сусветную арэну. Раней Міжнародны саюз сучаснага пяцібор’я дапусціў беларусаў да ўдзелу ў І этапе Кубка свету ў Каіры ў нейтральным статусе. На спаборніцтвах у Егіпце, якія пройдуць з 5 па 10 сакавіка, могуць выступіць 12 нашых спартсменаў – гэта Вольга Сілкіна, Марыя Гнедчык, Настасся Пракапенка, Віялета Гурэева, Настасся Малашанока, Ірына Прасянцова, Максім Фядотка, Яўген Арол, Уладзіслаў Несцераў, Ілья Палазкоў, Максім Марук і Іван Хамцоў.-0-
