7 лютага, Брэст /Кар. БЕЛТА/. Адкрытае першынство Беларусі па плаванні сярод юніёраў і юніёрак пройдзе ў Брэсце з 8 па 11 лютага, паведаміла карэспандэнту БЕЛТА прэс-сакратар Беларускай федэрацыі плавання Кацярына Раманоўская.
Для ўдзелу ў спаборніцтвах зарэгістраваліся больш за 300 спартсменаў ва ўзросце да 18 гадоў з усіх рэгіёнаў краіны. За высокія месцы пазмагаюцца юніёры 2005-2008 гадоў нараджэння і юніёркі 2006-2009 гадоў нараджэння. Большасць удзельнікаў маюць званні майстроў спорту і КМС. У іх ліку рэкардсмены рэспублікі па плаванні сярод юніёраў Карына Швед, Уладзіслаў Макарэвіч, Дар'я Баешка і іншыя.
Спаборніцтвы пройдуць у басейне Брэсцкага абласнога цэнтра алімпійскага рэзерву па водных відах спорту. Сёння адбудзецца афіцыйная трэніроўка ўдзельнікаў і судзейскі семінар. Непасрэдна заплывы на скорасць пачнуцца 8 лютага. Праграма разлічана на чатыры дні і разбіта на ранішнія і вячэрнія сесіі з папярэднімі, паўфінальнымі (для дыстанцый 50 м) і фінальнымі заплывамі.
Удзельнікі будуць спаборнічаць на дыстанцыях 50 м, 100 м, 200 м, 400 м, 800 м і 1500 м усімі стылямі плавання: брас, батэрфляй, вольны стыль, на спіне. Прадугледжаны таксама эстафеты: 4х100 м вольным стылем, камбінаваная і змешаная камбінаваная, а таксама 4х200 м вольным стылем. Галоўны суддзя спаборніцтваў - суддзя нацыянальнай катэгорыі Аляксандр Міхееў.
Старты з'яўляюцца адборачнымі для ўдзелу ў чэмпіянаце Еўропы сярод юніёраў па плаванні і першынстве Расійскай Федэрацыі, XVII Еўрапейскім юнацкім Алімпійскім фестывалі, а таксама ў II Гульнях краін СНД, якія Брэст будзе прымаць у жніўні.-0-
