Сцяг Аўторак, 19 сакавіка 2024
Усе навіны
Усе навіны
Спорт
17 мая 2022, 15:58

Больш за 300 бегуноў выйдуць на старт Сожскага паўмарафону ў Гомелі

17 мая, Гомель /Кар. БЕЛТА/. У Гомелі 21 мая пройдзе Сожскі паўмарафон, паведаміў карэспандэнту БЕЛТА намеснік начальніка ўпраўлення спорту і турызму аблвыканкама Аляксандр Асташонак.

Паклоннікам бегу прапануюць тры дыстанцыі: 5 км, 10 км і 21,1 км. Аб сваім удзеле ўжо заявілі больш за 300 чалавек з Беларусі, Расіі і Грузіі. Рэгістрацыя прадаўжаецца.

На старт, які запланаваны на 22.00, могуць выйсці паўналетнія ўдзельнікі. Верхняй узроставай планкі няма. Як паказвае вопыт ранейшых забегаў, за перамогу гатовы змагацца і прадстаўнікі ўзроставай катэгорыі 70+.

Каб атрымаць нагрудны нумар удзельніка, неабходна прад'явіць пасведчанне асобы, медыцынскую даведку аб стане здароўя або распіску-згоду на ўдзел, квітанцыю аб аплаце.

"Сярод удзельнікаў каля 5 працэнтаў - прафесіяналы, а абсалютная большасць - аматары бегу. Для прафесіяналаў Сожскі паўмарафон - адзін з крокаў падрыхтоўкі да больш сур'ёзных спаборніцтваў, а для аматараў - цудоўная магчымасць папоўніць скарбонку асабістых дасягненняў", - адзначыў Аляксандр Асташонак.

Ён звярнуў увагу, што Сожскі паўмарафон - доўгачаканая падзея гарадскога жыцця для паклоннікаў спорту. "Забегі праходзяць у цёмны час сутак, і ў гэтым пэўная адметнасць. Маршрут праходзіць па маляўнічых мясцінах палацава-паркавага ансамбля. Стартуюць удзельнікі на набярэжнай, бягуць праз лебядзіную сажалку, парк атракцыёнаў, уздоўж вул. Пралятарскай, пасля гэтага агібаюць сабор святых Пятра і Паўла, далей - праз палац Румянцавых і Паскевічаў і зноў да набярэжнай", - расказаў намеснік начальніка ўпраўлення.

У гэты ж вечар у палацава-паркавым ансамблі пройдзе "Ноч музеяў". "Як паказаў вопыт мінулага года, паклоннікі мастацтва сустракаюць удзельнікаў забегаў авацыямі. Атрымліваецца своеасаблівая група падтрымкі, што, вядома, надае сіл, асабліва тым, хто выбраў доўгія дыстанцыі", - падкрэсліў Аляксандр Асташонак.

Пераможцаў вызначаць сярод мужчын і сярод жанчын. На кветкавай цырымоніі ім уручаць грашовыя прызы і падарункі. Удзельнікі атрымаюць памятны медаль.

Аляксандр Асташонак дадаў: паклоннікаў бегу становіцца з году ў год больш. Сведчанне таму - узрастаючая цікавасць і да Сожскага паўмарафону, і да Гомельскага паўмарафону, які пройдзе ў кастрычніку. "Абодва паўмарафоны сталі лагічным працягам "Экалагічнага марафону", які праводзіўся з 2016 года", - удакладніў ён.

Сожскі паўмарафон нацэлены на папулярызацыю і развіццё масавага бегу як адной з перспектыўных і даступных форм заняткаў фізічнай культурай, павышэнне эфектыўнасці спартыўна-масавай работы. Арганізатары спартыўнага свята - упраўленне спорту і турызму Гомельскага аблвыканкама і абласная арганізацыя грамадскага аб'яднання Беларускай федэрацыі лёгкай атлетыкі.-0-

Падпісвайцеся на нас у
Twitter
Топ-навіны
Свежыя навіны Беларусі