Бокій стаў 20-разовым чэмпіёнам Паралімпійскіх гульняў

2 верасня, Мінск /Кар. БЕЛТА/. Беларускі плывец Ігар Бокій заваяваў дваццатае золата ў кар'еры на Паралімпійскіх гульнях, паведамляе карэспандэнт БЕЛТА.

У пяты дзень спаборніцтваў парыжскай Паралімпіяды Бокій прымаў удзел на дыстанцыі 50 метраў вольным стылем у класе S13. У ранішняй сесіі наш спартсмен паказаў рэзультат 23,60 сек. і прабіўся ў фінал з лепшым графікам. Вячэрні вырашальны заплыў беларус таксама закончыў першым з часам 23,65 сек. Серабро і бронзу заваявалі плыўцы з Украіны, а яшчэ адзін прадстаўнік нашай каманды Дзмітрый Салей фінішаваў восьмым.
 
Гэта ўзнагарода вышэйшай пробы на Гульнях стала для Бокага 20-й у кар'еры і чацвёртай у сталіцы Францыі: раней у басейне "Пары-Ла-Дэфанс Арэны" Ігар перамагаў на стаметроўках батэрфляем і на спіне, а таксама на дыстанцыі 400 метраў кролем. У Лондане-2012 і Токіа-2020 беларус выйграваў па пяць залатых медалёў, а на Паралімпіядзе ў Рыа ў 2016 годзе святкаваў поспех шэсць разоў.

Выступленні ў Парыжы Бокій завершыць заўтра: наш спартсмен заяўлены на 200-метроўцы комплексным плаваннем. Таксама ў аўторак барацьбу за выхад у фіналы павядуць Ягор Шчалканаў (S9, 100м на спіне) і Настасся Зудзілава (200м комплекс).-0-