2 ліпеня, Мінск /Кар. БЕЛТА/. Жараб'ёўка групавога этапу мужчынскай гандбольнай Лігі чэмпіёнаў адбылася 1 ліпеня ў штаб-кватэры Еўрапейскай федэрацыі гандбола ў Вене, паведамляе карэспандэнт БЕЛТА.
Брэсцкі гандбольны клуб імя Мяшкова трапіў у групу А, дзе яго сапернікамі будуць французскі "Пары Сен-Жэрмен", паўночнамакедонскі "Вардар" з горада Скоп'е, венгерскі "Пік" з Сегеда, партугальскі "Порту", нарвежскі "Эльверум", нямецкі "Фленсбург" і польскі "Вівэ" з Кельцаў, у якім выступаюць беларусы Арцём Каралёк і Уладзіслаў Кулеш.
У папярэдняй групе В згуляюць іспанская "Барселона", французскі "Нант", венгерскі "Веспрэм", нямецкі "Кіль", дацкі "Ольбарг", славенскі "Цэле", харвацкі "Заграб" і ўкраінскі "Матор" з Запарожжа, у якім у новым сезоне будуць гуляць адразу чатыры беларускія гандбалісты: Барыс Пухоўскі, Максім Бабічаў, Іван Мароз і Вячаслаў Бохан.
Спаборніцтвы ў групах пачнуцца 16 верасня 2020 года, а фінішуюць 4 сакавіка 2021-га. Па выніках групавога этапу прамыя пуцёўкі ў чвэрцьфінальную стадыю атрымаюць па два лепшыя клубы. Каманды, якія зоймуць 3-6-я месцы, у сакавіку-красавіку згуляюць у паядынках плэй-оф за чатыры астатнія пропускі ў 1/4 фіналу. Чвэрцьфіналы намечаны на сярэдзіну мая, "Фінал чатырох" павінен прайсці 12-13 чэрвеня.
У гэтым сезоне Лігі чэмпіёнаў БГК імя Мяшкова выступіў няўдачна і не змог прабіцца ў плэй-оф. Пасля фінішу групавога этапу ў сакавіку ў сувязі з пандэміяй каранавіруса ЕГФ прыняла рашэнне не праводзіць матчы 1/8 і 1/4 фіналу, а завяршыць сезон "Фіналам чатырох", у якім выступяць па дзве лепшыя каманды з двух папярэдніх груп - "Барселона", "Пары Сен-Жэрмен", "Кіль" і "Веспрэм". Плануецца, што вырашальны этап чэмпіёнскай Лігі-2019/20 пройдзе 28-29 снежня ў нямецкім Кёльне.-0-