2 сакавіка, Мінск /Кар. БЕЛТА/. Зборная Беларусі па міні-футболе правядзе сёння ў Ерэване другі паядынак адборачнага турніру чэмпіянату свету 2024 года, паведамляе карэспандэнт БЕЛТА.
На паркеце тэхнічнага цэнтра Армянскай федэрацыі футбола падапечныя Аляксандра Чэрніка згуляюць з камандай Літвы. Паслязаўтра, 4 сакавіка, другая сустрэча з літоўцамі, а 7 сакавіка заключны матч у 4-й кваліфікацыйнай групе з дзеючым чэмпіёнам свету і Еўропы зборнай Партугаліі. На старце адборачнага турніру беларуская дружына прайграла на выездзе партугальцам з лікам 3:5. Акрамя таго, партугальская каманда двойчы выйграла ў літоўцаў - 6:0 (у гасцях) і 2:0 (дома). Становішча ў гэтым трыа цяпер такое: Партугалія - 9 ачкоў (3 матчы), Беларусь - 0 (1), Літва - 0 (2).
У армянскай сталіцы ў складзе беларускай каманды згуляюць: варатары - Аляксей Лукша ("Сталіца", Мінск), Андрэй Чурылін (ФК "Мінск"); палявыя ігракі - Юрый Дубкоў, Арцём Зуёнак, Аляксандр Альшэўскі (усе - ФК "Мінск"), Арцём Козел, Ігар Шчэрбіч (абодва - "Сталіца", Мінск), Дзмітрый Лось, Антон Мацвеенка, Аляксей Пінчук, Уладзіслаў Сялюк, Дзмітрый Шыманоўскі (усе - ВРЗ, Гомель), Павел Рагавік ("Вітэн", Орша), Сяргей Крыкун (КПРФ, Масква, Расія), Дзмітрый Швядко ("Газпрам-Югра", Расія).
Адразу ў элітны адборачны раўнд кваліфікацыі сусветнага першынства выйдуць пераможцы 12 адборачных груп і 4 лепшыя каманды, якія занялі другія месцы. Астатнія 8 зборных, якія фінішуюць другімі, у стыкавых паядынках вызначаць яшчэ чатырох удзельнікаў элітнай стадыі.-0-
