Сцяг Чацвер, 28 сакавіка 2024
Усе навіны
Усе навіны
Спорт
06 верасня 2021, 15:25

Беларусы выйшлі ў паўфінал Гульняў краін СНД у турніры па баскетболе 3х3

6 верасня, Мінск /Кар. БЕЛТА/. Мужчынская і жаночая зборныя Беларусі па баскетболе 3х3 выйшлі ў паўфінал першых Гульняў краін СНД, паведамляе карэспандэнт БЕЛТА.

На папярэднім этапе жаночага турніру беларускія баскетбалісткі ўпэўнена абыгралі саперніц з Узбекістана - 22:11 і Арменіі - 19:11, але ўступілі расіянкам - 12:18. Сёння ў паўфінале беларускі зноў сустрэнуцца з узбекскімі спартсменкамі і ў выпадку перамогі згуляюць у фінале з расійскай камандай. У складзе зборнай Беларусі пад кіраўніцтвам Юрыя Воўка ў Казані выступаюць Кацярына Карчэўская, Наталля Гарбачова, Алена Цітавец і Ірына Краўчанка.

У спаборніцтвах мужчын беларусы сталі першымі ў папярэдняй групе В, перамогшы каманды Азербайджана - 20:12 і Кыргызстана - 16:11. Сёння ў паядынку за выхад у фінал беларускія баскетбалісты згуляюць з узбекамі. У другім паўфінале расіяне будуць сапернічаць з азербайджанцамі. Галоўны трэнер беларускай дружыны Дзмітрый Калтуноў разлічвае на паспяховую гульню Цімура Друкава, Аляксея Навойчыка, Віталя Лебедзева і Кірыла Васкаўцова.

У сталіцы Татарстана Беларусь будзе прадстаўлена ў турнірах па бадмінтоне, баскетболе 3х3, боксе, дзюдо, каратэ, настольным тэнісе, кулявой стральбе, самба, спартыўнай барацьбе, тайландскім боксе, міні-футболе і танцавальным спорце. Усяго на першыя Гульні краін СНД заяўлена 1100 атлетаў ва ўзросце ад 14 да 23 гадоў з дзевяці краін: Казахстана, Таджыкістана, Азербайджана, Кыргызстана, Узбекістана, Арменіі, Малдовы, Беларусі, Расіі. У праграму Гульняў уключана 16 відаў спорту, у якіх будуць разыграны 182 камплекты ўзнагарод.

Першапачаткова спаборніцтвы павінны былі прайсці з 20 па 27 жніўня 2020 года, затым з-за пандэміі каранавіруса былі перанесены на верасень таго ж года і пасля на 2021 год.-0-

Падпісвайцеся на нас у
Twitter
Топ-навіны
Свежыя навіны Беларусі