Беларусы Вайлупаў і Каралёк прайшлі ў 1/4 фіналу гандбольнай Лігі чэмпіёнаў

5 красавіка, Мінск /Кар. БЕЛТА/. У гандбольнай Лізе чэмпіёнаў вызначыліся ўсе ўдзельнікі чвэрцьфінальнай стадыі, паведамляе карэспандэнт БЕЛТА.

Гандбалісты "Веспрэма" ў венгерскім дэрбі 1/8 фіналу другі раз абыгралі "Піком" з Сегеда - 39:32. Беларускі правы крайні пераможцаў Мікіта Вайлупаў закінуў восем мячоў. У чвэрцьфінале "Веспрэм" сустрэнецца з дацкім "Ольбаргам".

Польскі "Кельцэ" ў сябе дома ўзяў верх над дацкім "Гудме" з лікам 33:28. Беларускі лінейны польскага клуба Арцём Каралёк вызначыўся два разы. У паядынках за выхад у "Фінал чатырох" "Кельцэ" будзе сапернічаць з нямецкім "Магдэбургам". Гэтыя сапернікі сустракаліся ў вырашальным матчы мінулага сезона ЛЧ і тады поспех быў на баку прадстаўнікоў бундэслігі - 30:29 (у авертайме).

Польская "Вісла" з Плоцка з беларусам Кірылам Самойлам у складзе не змагла прабіцца ў чвэрцьфінал, двойчы ўступіўшы французскаму клубу "Пары Сен-Жэрмен" (26:30 і 33:34), які згуляе з іспанскай "Барселонай". Апошнюю чвэрцьфінальную пару склалі французскі "Манпелье" і нямецкі "Кіль".

Першыя чвэрцьфіналы пройдуць 24-25 красавіка, паядынкі ў адказ за выхад у вырашальны этап чэмпіёнскай Лігі адбудуцца 1-2 мая.-0-