Беларусы Шчалканаў і Ціханёнак сталі прызёрамі этапу Сусветнай серыі па пара-плаванні ў Італіі

17 сакавіка, Мінск /Кар. БЕЛТА/. Беларускія спартсмены Ягор Шчалканаў і Дзмітрый Ціханёнак заваявалі ўзнагароды этапу Сусветнай серыі па плаванні сярод атлетаў з абмежаванымі магчымасцямі, які праходзіў у італьянскім Ліньяна-Саб'ядора, паведамляе карэспандэнт БЕЛТА.

Удзел у турніры прынялі спартсмены з 40 краін. Прадстаўнікі розных класаў паралімпійскага плавання спаборнічалі паралельна, а паказаныя секунды пералічваліся ў ачкі ў залежнасці ад класа ўдзельніка (S1/S10 - пашкоджанні апорна-рухальнага апарату, S11/S13 - парушэнні зроку, S14 - інтэлектуальныя парушэнні). На стаметроўцы на спіне другое месца заняў чэмпіён парыжскай Паралімпіяды на гэтай дыстанцыі Ягор Шчалканаў (S9), перамогу атрымаў бразілец Габрыэль Бандэйра (S14). Таксама беларус быў пятым на сотні брасам, яго таварыш па камандзе Дзмітрый Салей (S12) замкнуў дзясятку.

Двухразовым прызёрам спаборніцтваў сярод моладзі стаў Дзмітрый Ціханёнак (S9) - наш спартсмен паказаў трэція рэзультаты на стаметроўках брасам і батэрфляем, а таксама размясціўся на чацвёртым радку на 50 м кролем і на сёмай пазіцыі на дыстанцыі 400 метраў вольным стылем. Акрамя таго, двойчы пятае месца ў маладзёжным заліку займала беларуска Дар'я Шашко (S10, 100 м брасам і 100м на спіне), таксама рэзультаты ў топ-15 паказвалі нашы Настасся Зудзілава, Яўген Кавалёнак і Уладзімір Ізотаў.-0-