18 верасня, Мінск /Кар. БЕЛТА/. На вяслярным канале ў Барнауле завяршыліся міжнародныя спаборніцтвы па веславанні на байдарках і каноэ "Алтайская рэгата", паведамляе карэспандэнт БЕЛТА.
Усяго ў спаборніцтвах прынялі ўдзел больш за 300 спартсменаў, якія разыгралі медалі ў веславанні на байдарках і каноэ, на лодках класа "Дракон" і ў веславанні на дошцы стоячы. Галоўным стартам турніру ў Барнауле стала "Гонка чэмпіёнаў", у якой выступілі 40 мацнейшых байдарачнікаў і канаістаў з васьмі краін: Беларусі, Расіі, Балгарыі, Турцыі, Калумбіі, Чылі, Узбекістана і Таджыкістана. Спартсмены вызначалі лепшых на дыстанцыі 500 метраў у заездах адзіночак, на дыстанцыі 350 метраў сярод змешаных экіпажаў двоек, а таксама ў камбінаванай эстафеце 4х200 метраў.
У фінале мужчынскай байдаркі-адзіночкі ўвесь п'едэстал аказаўся беларускім: перамогу атрымаў Уладзіслаў Кравец, другім фінішаваў Дзмітрый Натынчык, трэцім стаў Мікіта Борыкаў. У аналагічным відзе праграмы ў жанчын першынствавала наша Вольга Худзенка, а Марына Літвінчук выйграла серабро. У заездзе каноэ-адзіночак усе тры месцы на подыуме зноў занялі беларускі: золата ў Алены Наздровай, серабро ў Вольгі Клімавай, бронза ў Юліі Трушкінай.
У фінале змешаных экіпажаў у байдарачнікаў перамог наш Дзмітрый Натынчык у пары з расіянкай Настассяй Панчанка, а мікст сярод канаістаў выйграў беларуска-расійскі дуэт Юлія Трушкіна - Захар Пятроў. Таксама медалі ў гэтай дысцыпліне заваявалі Вольга Худзенка (серабро), Мікіта Борыкаў (бронза) і Арцём Козыр (бронза). Акрамя таго, Алена Наздрова і Уладзіслаў Кравец у складзе інтэрнацыянальнай чацвёркі сталі другімі ў эстафеце, а Юлія Трушкіна і Марыя Каваленка разам з прадстаўнікамі Балгарыі і Узбекістана фінішавалі ў гэтым відзе трэцімі.-0-
