18 верасня, Мінск /Кар. БЕЛТА/. Валейбалісты зборнай Беларусі паражэннем ад турак з лікам 1:3 (21:25, 24:26, 25:20, 19:25) завяршылі выступленне на чэмпіянаце Еўропы ў славенскай Любляне, паведамляе карэспандэнт БЕЛТА.
Пасля таго, як каманда Македоніі сенсацыйна перамагла сапернікаў са Славеніі (3:1), беларусы былі пазбаўлены права на памылку. Аднак першую партыю наўрад ці можна занесці ім у актыў. Турэцкія валейбалісты выглядалі лепш і па заслугах святкавалі поспех - 25:21.
Другі сэт прайшоў у куды больш цікавай барацьбе. Беларускія спартсмены, адстаючы большую частку партыі, змаглі ў канцоўцы выраўняць сітуацыю. Але, на жаль, апошнія розыгрышы засталіся за камандай з берагоў Басфора (26:24), што аўтаматычна звяло да нуля шанцы беларусаў на прадаўжэнне турнірнай барацьбы на кантынентальным першынстве.
У трэцяй партыі падапечныя Віктара Бекшы пачалі добра даводзіць да пасуючага і пайшла звычайная для беларусаў хуткая гульня з акцэнтам на краі. Зрэшты, у вырашальным сэце туркі змаглі зноў вярнуць сабе перавагу - 25:19.
Такім чынам, на групавым этапе беларускія валейбалісты пацярпелі чатыры паражэнні. Да сённяшняй няўдачы яны ўступілі славенцам (0:3), расіянам (1:3) і македонцам (1:3). Адзіную вікторыю на гэтай стадыі турніру падапечныя Віктара Бекшы атрымалі на тай-брэйку і перамаглі фінаў (3:2).
Канчатковая расстаноўка ў турнірнай табліцы групы С стане зразумелай пасля матчаў расіян са славенцамі і македонцаў з фінамі.
У 1/8 фіналу кантынентальнага першынства выходзяць па чатыры лепшыя каманды з чатырох папярэдніх груп.-0-
