21 лютага, Мінск /Кар. БЕЛТА/. Дзве беларускія тэнісісткі выйшлі ў другі раўнд турніру катэгорыі WTA-1000 у катарскім г. Доха з прызавым фондам $2,3 млн, паведамляе карэспандэнт БЕЛТА.
У матчы 1/32 фіналу Аляксандра Сасновіч за 55 хвілін разграміла ў двух сэтах кітайскую тэнісістку Чжан Шуай (66) - 6:1, 6:1. У другім раўндзе саперніцай беларускі будзе дзясятая ракетка свету Унс Джабір з Туніса. Сасновіч прабілася ў асноўную сетку праз кваліфікацыю. У першым крузе ўпэўнена абыграла ў двух сэтах румынку Ану Богдан (101) - 6:1, 6:1, а потым перамагла бельгійскую тэнісістку Кірстэн Фліпкенс (324) - 6:3, 6:2.
Экс-першая ракетка свету Вікторыя Азаранка ў першым раўндзе сустракалася з прадстаўніцай Казахстана Юліяй Пуцінцавай (42) і перамагла ў напружаным трохсэтавым паядынку - 5:7, 6:2, 7:5. У вырашальнай партыі Вікторыя Азаранка была на мяжы паражэння. Яна ўступала 0:4, потым дагнала саперніцу, затым пры ліку 5:4 Пуцінцава мела матчбол, але беларуска змагла зраўнаваць лік і дабілася перамогі. Сустрэча прадаўжалася 2 гадзіны 45 хвілін. У 1/16 фіналу Вікторыя Азаранка згуляе з амерыканкай Мэдзісан Брэнгл (60).
Лепшая беларуская тэнісістка, другая ракетка планеты Арына Сабаленка, пасеяная пад першым нумарам, пачне выступленне ў катарскай сталіцы з 1/16 фіналу. Яе саперніцай будзе пераможца матчу паміж расіянкай Людмілай Самсонавай (34) і францужанкай Алізэ Карнэ (37).
Спаборніцтвы ў г.Доха завершацца 26 лютага.-0-
