10 мая, Мінск /Кар. БЕЛТА/. У Мінску завяршыўся першы этап турніру па сучасным пяцібор'і "Кубак Паўла Ляднёва", у якім прынялі ўдзел спартсмены з Беларусі і Расіі, паведамілі БЕЛТА ў прэс-службе БФСП.
Напярэдадні залаты медаль жаночых спаборніцтваў заваявала беларуска Вольга Сілкіна, якая набрала 1438 ачкоў. Серабро і бронза дасталіся Гульназ Губайдулінай і Яне Салаўёвай з Расіі (1431 і 1415 балаў адпаведна).
У панядзелак сярэбраным прызёрам мужчынскага турніру стаў наш Ілья Палазкоў. Беларус паказаў рэзультат 1529 ачкоў і прапусціў наперад толькі Аляксандра Ліфанава з Расіі (1533 бала). Тройку мацнейшых замкнуў яшчэ адзін расіянін Пётр Баршчоў.
Другі этап "Кубка Паўла Ляднёва" пройдзе ў Маскве з 24 па 29 мая. Акрамя зборных Беларусі і Расіі на турнір будуць запрошаны пяціборцы з Казахстана, Узбекістана і Кітая.-0-
