11 сакавіка, Мінск /Кар. БЕЛТА/. Беларускія лыжныя акрабаты Ганна Гуськова, Макар Мітрафанаў і Павел Дзік занялі чацвёртае месца ў спаборніцтвах змешаных каманд на чэмпіянаце свету па фрыстайле ў Чымбулаку (Казахстан), паведамляе карэспандэнт БЕЛТА.
Беларускія спартсмены атрымалі за свае скачкі ад суддзяў падагульняючую ацэнку 247,74 бала.
Узначалілі падагульняючы пратакол лыжныя акрабаты з Расіі Любоў Нікіціна, Павел Кротаў і Максім Бураў, якія зарабілі недасягальныя для сапернікаў 300,94 бала.
Другое месца заняла швейцарская дружына, за якую выступалі Кэрал Бувард, Пірмін Вернер і Ной Рот - 293,46 бала. Замкнулі тройку мацнейшых прадстаўнікі каманды ЗША Эшлі Колдуэл, Эрык Лугран і Крыстафер Ліліс - 283,97 бала.-0-