2 чэрвеня, Мінск /Кар. БЕЛТА/. Дзве алімпійскія ліцэнзіі ў кіданні молата выйгралі беларускія лёгкаатлеты на чэмпіянаце Малдовы па лёгкай атлетыцы, паведамілі БЕЛТА ў прэс-службе Беларускай федэрацыі лёгкай атлетыкі.
У жанчын на спаборніцтвах у Кішынёве Настасся Каламоец перапісала асабісты рэкорд, адправіўшы снарад на адзнаку 72 м 58 см. Гэта на 8 см перавышае нарматыў каралевы спорту для таго, каб трапіць на галоўныя старты чатырохгоддзя.
У мужчын у стартах малатабойцаў Юрыю Васільчанку, каб забяспечыць сабе алімпійскую ліцэнзію, спатрэбілася адна спроба - 77 м 65 см. Гэтага хапіла, каб на 15 см перасягнуць алімпійскі нарматыў. На гэтым беларускі спартсмен не спыніўся і адправіў снарад на 77 м 81 см. Гэта гарантавала яму серабро турніру.
Перамогу атрымаў малдаўскі малатабоец Сяргей Маргіеў - 78 м 21 см. Ва ўкраінца Сяргея Перавознікава бронза - 77 м 60 см.-0-
