ДЗЯРЖОРГАНЫДЗЯРЖОРГАНЫ
Флаг Серада, 1 снежня 2021
Мінск Суцэльная воблачнасць -5°C
Усе навіны
Усе навіны
Спорт
27 жніўня 2021, 19:56

Беларускія хакеісты перамаглі аўстрыйцаў у другім матчы алімпійскай кваліфікацыі

27 жніўня, Мінск /Кар. БЕЛТА/. Хакеісты зборнай Беларусі выйгралі другі матч кваліфікацыйнага турніру Алімпійскіх гульняў - 2022, які праходзіць у Браціславе (Славакія), перамогшы зборную Аўстрыі з лікам 5:2 (0:2, 5:0, 0:0), паведамляе карэспандэнт БЕЛТА.

У першым перыядзе аўстрыйцы гулялі ў камбінацыйны хакей, смела пераводзячы шайбу з фланга на фланг, і акуратна дзейнічалі ў абароне. Беларусы стараліся перахапіць ініцыятыву, але часам залішне мудрагеліста дзейнічалі ў завяршальнай стадыі сваіх нападзенняў. У выніку аўстрыйская каманда першай адкрыла лік.

На дзявятай мінуце большасць рэалізаваў Рафаэль Хербургер, які замкнуў перадачу Лукаса Хаўдума. Беларуская каманда адказала небяспечнымі момантамі пасля кідкоў Ніка Бэйлена і Яўгена Лісаўца. Падапечныя Крэйга Вудкрафта двойчы гулялі ў большасці, але беспаспяхова. А вось аўстрыйцы сваім шанцам скарысталіся. На 19-й мінуце яны правялі ўзорную контратаку, вынікам якой стаў дакладны кідок Браяна Леблера.

Пачатак другой трэці паядынку стаў бенефісам Андрэя Стася, які ў выніку быў прызнаны лепшым іграком сустрэчы ў зборнай Беларусі. Спачатку, на 21-й мінуце, вопытны ігрок рэзультатыўна падставіў клюшку пад кідок Ніка Бэйлена. Затым, на 26-й мінуце, хакеіст чэлябінскага "Трактара" асісціраваў Ягору Шаранговічу. На гэтым непрыемнасці для аўстрыйцаў не скончыліся.

Сапернікі беларусаў, прапусціўшы двойчы, пачалі залішне прыціскацца да сваіх варот, не думаючы пра рэзультатыўныя атакі. Як вынік, яшчэ тры прапушчаныя шайбы. Спачатку Ягор Шаранговіч аформіў галявы дубль кідком з-пад абаронцы ў далёкую дзявятку (33-я мінута). Затым сваё важкае слова сказаў Шэйн Прынс, які адгукнуўся на перадачу Арцёма Дзямкова (37-я мінута). І, нарэшце, пятае ўзяцце варот стала вынікам узаемадзеяння Франсіса Парэ, Шэйна Прынса і Джэфа Плата, які стаў аўтарам закінутай шайбы.

Пасля другога перапынку аўстрыйцы спрабавалі адыграцца, беларусы ў сваю чаргу спрабавалі злавіць сапернікаў на контратаках, аднак лік так і не змяніўся.

Заключны паядынак у рамках алімпійскай кваліфікацыі каманда Крэйга Вудкрафта правядзе 29 жніўня супраць зборнай Славакіі.

У кваліфікацыйнай групе Е ў Рызе гуляюць хакеісты Латвіі, Венгрыі, Францыі і Італіі, а ў квартэце F выступаюць зборныя Нарвегіі, Даніі, Славеніі і Рэспублікі Карэя.

У хакейным турніры зімовай Алімпіяды-2022 у Пекіне згуляюць 12 зборных: восем лепшых каманд па рэйтынгу IIHF, каманда Кітая як прадстаўнік краіны - арганізатара Алімпіяды, і тры дружыны - пераможцы ў групах алімпійскай кваліфікацыі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі