21 студзеня, Мінск /Кар. БЕЛТА/. Гандбалісты зборнай Беларусі згулялі ўнічыю са шведамі 26:26 на старце другога этапу чэмпіянату свету ў Егіпце, паведамляе карэспандэнт БЕЛТА.
Пачатак гульні з адным з фаварытаў сусветнага першынства застаўся за беларусамі, якія дзейнічалі вельмі сабрана. У ходзе першага тайма іх перавага даходзіла да васьмі мячоў, але да перапынку шведы скарацілі разрыў да чатырох мячоў - 11:15. У другой палавіне скандынавы спачатку дагналі беларусаў, потым некалькі разоў выходзілі наперад, але ў выніку сустрэча завяршылася ўнічыю.
У стартавым матчы 4-й групы гандбалісты Славеніі ўпэўнена перамаглі зборную Паўночнай Македоніі - 31:21. Расіяне прайгралі гаспадарам турніру егіпцянам - 23:28. Становішча каманд: Швецыя - 5 ачкоў, Славенія - 4, Егіпет - 4, Расія - 3, Беларусь - 2, Паўночная Македонія - 0. Свой наступны матч падапечныя Юрыя Шаўцова правядуць 22 студзеня супраць каманды Егіпта. У гэты ж дзень расіяне сустрэнуцца з камандай Паўночнай Македоніі, а шведы будуць сапернічаць з егіпцянамі.
Рэзультаты гульняў у 3-й групе: Швейцарыя - Ісландыя - 20:18, Францыя - Алжыр - 29:26, Нарвегія - Партугалія - 29:28. Становішча каманд: Францыя - 6, Партугалія - 4, Нарвегія - 4, Швейцарыя - 2, Алжыр - 0.
Сёння вечарам стартавыя матчы другога раўнда адбудуцца яшчэ ў двух квартэтах: 1. Венгрыя (4 ачкі) - Бразілія (1), Іспанія (3) - Германія (2), Польшча (2) - Уругвай (0). 2. Данія (4) - Катар (2), Харватыя (3) - Бахрэйн (0), Аргенціна (2) - Японія (1).
Пасля завяршэння матчаў другога раўнда ў чвэрцьфінал выйдуць па дзве лепшыя каманды з чатырох груп. Чвэрцьфінальныя сустрэчы пройдуць 27 студзеня, паўфіналы - 29 студзеня, фінальны паядынак за чэмпіёнскі тытул і матч за бронзу адбудуцца 31 студзеня. У сувязі з пандэміяй COVID-19 сустрэчы сусветнага першынства праходзяць без гледачоў.-0-
