3 чэрвеня, Мінск /Кар. БЕЛТА/. Футбалісты нацыянальнай зборнай Беларусі сёння прымуць старт у новым сезоне Лігі нацый УЕФА, паведамляе карэспандэнт БЕЛТА.
Свой першы паядынак у 3-й групе трэцяга па рангу дывізіёна - лігі С, падапечныя Георгія Кандрацьева правядуць на полі стадыёна "Караджорджэ" ў сербскім Нові-Садзе супраць каманды Славакіі (пачатак у 21.45; прамая трансляцыя на тэлеканале "Беларусь 5"). Гэту сустрэчу рассудзіць брыгада французскіх рэферы на чале са Стэфані Фрапар. Там жа беларускія футбалісты правядуць яшчэ два свае дамашнія паядынкі: 6 чэрвеня з азербайджанцамі і 10 чэрвеня са зборнай Казахстана.
Расклад выязных гульняў беларусаў: 13 чэрвеня - Азербайджан - Беларусь, 22 верасня - Казахстан - Беларусь, 25 верасня - Славакія - Беларусь.
Турнір у лізе С пачаўся ўчора. У першым матчы 2-й групы зборная Кіпра ў Ларнацы ўступіла Косава - 0:2. У Белфасце каманда Паўночнай Ірландыі прайграла грэкам з лікам 0:1. У матчы 4-й групы футбалісты зборнай Грузіі разграмілі ў Тбілісі каманду Гібралтара - 4:0, а балгарскія футбалісты ў Разградзе разышліся мірам з камандай Паўночнай Македоніі - 1:1.
У 1-й групе сустрэчы стартавага тура пройдуць заўтра: Літва - Люксембург, Турцыя - Фарэрскія астравы. Па выніках групавога этапу пераможцы чатырох квартэтаў атрымаюць права згуляць у наступным сезоне рангам вышэй - у лізе В. Каманды, якія фінішуюць апошнімі, правядуць стыкавыя матчы, пасля якіх дзве з іх апусцяцца ў лігу D.
Некалькі гульняў адбылося ў вышэйшым дывізіёне - лізе А. У 2-й групе футбалісты Іспаніі ў Севільі згулялі ўнічыю з Партугаліяй - 1:1. У Празе чэхі выйгралі ў швейцарцаў - 2:1. У 4-й групе зборная Польшчы ў Вроцлаве атрымала валявую вікторыю над камандай Уэльса з лікам 2:1. Фаварыты гэтага квартэта згуляюць сёння - у Бруселі зборная Бельгіі прыме суседзяў з Нідэрландаў. Таксама сёння ў 1-й групе дзеючыя пераможцы Лігі нацый, чэмпіёны свету французы згуляюць у Парыжы з датчанамі, а віцэ-чэмпіёны планеты харваты ў г. Осіек сустрэнуцца з гасцямі з Аўстрыі.
У 2-й групе лігі В ізраільцяне ў Хайфе завяршылі ўнічыю сустрэчу з ісландцамі - 2:2. Тут таксама выступяць албанскія футбалісты. У 4-й групе сербы ў Бялградзе прайгралі зборнай Нарвегіі з рэзультатам 0:1, а ў Любляне славенцы ўступілі камандзе Швецыі - 0:2.
Цяперашні сезон Лігі нацый трэці па ліку. Пераможцам першага ў 2019 годзе стала зборная Партугаліі, у 2021 годзе турнір выйгралі футбалісты Францыі. Зборная Беларусі стартавала з лігі D і, заняўшы першае месца ў 2-й групе, паднялася ў лігу С. У мінулым сезоне беларусы не змаглі атрымаць павышэнне ў класе - яны сталі другімі ў 4-й групе, уступіўшы першую пазіцыю албанцам.-0-
