17 верасня, Мінск /Кар. БЕЛТА/. Футбалісткі жаночай зборнай Беларусі правядуць сёння стартавы паядынак адборачнага турніру чэмпіянату свету 2023, паведамляе карэспандэнт БЕЛТА.
У матчы першага тура кваліфікацыйнай групы С беларускі прымуць на полі мінскага стадыёна "Дынама" дэбютантак адборачнага турніру сусветнага першынства кіпрскіх футбалістак. Гэта сустрэча пачнецца ў 18.00, прычым уваход на трыбуны галоўнай спартыўнай арэны свабодны. Таксама сёння адзін з фаварытаў гэтай групы віцэ-чэмпіён планеты зборная Нідэрландаў прыме ў Гронінгене каманду Чэхіі. У групе С таксама згуляе зборная Ісландыі.
Пераможцы дзевяці еўрапейскіх адборачных груп атрымаюць прамыя пропускі ў фінальную стадыю 9-га жаночага чэмпіянату свету. Каманды, якія фінішуюць другімі, у матчах плэй-оф разыграюць яшчэ дзве пуцёўкі ў Аўстралію і Новую Зеландыю. Летам 2023 года яны стануць гаспадарамі планетарнага форуму, у якім упершыню прымуць удзел 32 каманды. У фінале ЧС-2019 у Францыі зборная ЗША заваявала сваё чацвёртае золата, перамогшы нідэрландскіх футбалістак з рэзультатам 2:0. Уладальніцамі бронзавых узнагарод сталі шведкі, якія перамаглі ў матчы за 3-е месца англічанак з лікам 2:1.-0-