ДЗЯРЖОРГАНЫДЗЯРЖОРГАНЫ
Флаг Пятніца, 17 верасня 2021
Мінск Пераменная воблачнасць +8°C
Усе навіны
Усе навіны
Спорт
14 мая 2021, 17:33

Беларускія біятланісты дабіліся ў мінулым сезоне значнага прагрэсу - Віктар Лукашэнка

Фота з архіва
Фота з архіва

14 мая, Мінск /Кар. БЕЛТА/. Беларускія біятланісты дабіліся ў мінулым сезоне значнага прагрэсу і даказалі, што гэты від спорту заслужана займае месца аднаго з вядучых у краіне. Такое меркаванне выказаў сёння на цырымоніі ўшаноўвання ў штаб-кватэры Нацыянальнага алімпійскага камітэта Беларусі спартсменаў, трэнераў і кіраўніцтва Беларускай федэрацыі біятлона прэзідэнт НАК Віктар Лукашэнка.

"Беларуская каманда ў цэлым сур'ёзна прыбавіла, пра што сведчаць тыя вынікі, якія мы ўсе цудоўна ведаем. Гэта перамогі Дзінары Алімбекавай і Ганны Солы. Вельмі ўдала выступілі эстафеты. Дабіліся значнага паляпшэння рэзультатаў прадстаўнікі мужчынскай каманды. Відавочна, што біятлон у нас прагрэсіруе і даказаў сваё месца аднаго з вядучых відаў спорту ў Беларусі", - сказаў Віктар Лукашэнка.

Гаворачы пра бліжэйшае будучае кіраўнік НАК нагадаў, што ў наступным годзе біятланістаў чакае сур'ёзнае выпрабаванне на Гульнях у сталіцы Кітая. "У лютым наступнага года на Алімпіядзе ў Пекіне для ўсіх нас будзе сур'ёзны экзамен. Біятлон у нас з'яўляецца адным з нямногіх зімовых відаў спорту, у якім мы можам разлічваць на медалі. Таму мы вельмі на вас спадзяёмся і ўсімі сіламі будзем падтрымліваць", - дадаў Віктар Лукашэнка.

Старшыня наглядальнага савета Беларускай федэрацыі біятлона Валерый Вакульчык адзначыў ролю дзяржавы і НАК Беларусі ў падтрымцы біятлона, без якой рэзультаты мінулага сезона былі б не такімі высокімі.

"У першую чаргу за кошт якаснай перадсезоннай падрыхтоўкі ўдалося паказаць добрыя вынікі ў мінулым сезоне. Працавалі з камандай спецыялісты, якія дапамагалі, плюс мая матывацыя праявіць сябе стала адным з ключавых фактараў. У дадатак стабільная стральба, з кожнай гонкай адчувала сябе больш упэўнена, усё склалася добра. Пад канец сезона завялася яшчэ больш, мне хацелася прадаўжаць выступаць, самае складанае для мяне - водпуск. Хочацца не разгубіць гэту форму і да алімпійскага сезона падысці ў поўным узбраенні", - адзначыла Дзінара Алімбекава.

Завяршаючы афіцыйную частку сустрэчы, бакі абмяняліся падарункамі.

Нагадаем, што ў мінулым сезоне Дзінара Алімбекава заваявала золата і серабро на трэцім этапе Кубка свету ў Хохфільцэне. Затым былі сярэбраныя медалі ў гонцы праследавання ў Нова-Места і ў мас-старце ў Эстэрсундзе. Гэты сезон біятланістка завяршыла на сёмым месцы ў агульным заліку Кубка свету і на першым - сярод спартсменаў да 25 гадоў.

Ганна Сола на чэмпіянаце свету ў Славеніі заваявала адзіны медаль для беларускай каманды - бронзу ў спрынце. На этапе планетарнага Кубка ў Эстэрсундзе стала трэцяй у гонцы праследавання.

Яшчэ дзве сярэбраныя ўзнагароды жаночая каманда Беларусі выйграла ў эстафетах на этапах Кубка свету ў Оберхофе і ў Нова-Места. Дзяўчыны падняліся на пятую пазіцыю ў заліку Кубка нацый і дабіліся пашырэння свайго прадстаўніцтва. У спрынтарскіх і індывідуальных гонках беларуская жаночая каманда можа быць прадстаўлена не чатырма, а шасцю спартсменкамі.

Мужчынская зборная Беларусі заняла дзявятае месца ў Кубку нацый, захаваўшы квоту на пяць спартсменаў.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі