17 студзеня, Мінск /Кар. БЕЛТА/. Жаночая зборная Беларусі па біятлоне заняла 12-е месца ў эстафеце на пятым этапе Кубка свету па біятлоне, які праходзіць у нямецкім Рупольдынгу, паведамляе карэспандэнт БЕЛТА.
Беларускі квартэт у складзе Дзінары Алімбекавай, Ірыны Крыўко, Ганны Сола і Алены Кручынкінай уступіў лідару гонкі 3 мін 13,9 сек. Першай стала каманда Нарвегіі, якая пераадолела эстафету 4х6 км за 1 гадз 8 мін 46,4 сек. Другое месца занялі французскія спартсменкі (адставанне 10,7 сек). Замкнулі тройку лідараў біятланісткі са Швейцарыі (адставанне 20,7 сек).
Усяго стартавалі 23 каманды.
Завершыцца пяты этап Кубка свету 19 студзеня гонкамі праследавання ў мужчын і жанчын.-0-