21 лютага, Мінск /Кар. БЕЛТА/. Баскетбалісты зборнай Беларусі пачалі падрыхтоўку да чарговых адборачных матчаў чэмпіянату свету з камандай Вялікабрытаніі, паведамляе карэспандэнт БЕЛТА.
Галоўны трэнер беларускай дружыны Расціслаў Вяргун выклікаў на збор 19 ігракоў: Арцём Парахоўскі ("Парма", Перм, Расія), Іван Аладка ("Русічы", Курск, Расія), Уладзіслаў Мікульскі ("Барысфен", Магілёў), Андрэй Стаброўскі, Аляксей Трасцінецкі, Цімафей Паралёў, Яўген Белянкоў, Вадзім Стубеда, Дарол Эрнандэс-Зіненка, Уладзіслаў Блізнюк, Максім Коратцаў, Кірыл Васкаўцоў, Данііл Барысевіч, Раман Шчарбакоў, Вадзім Траццяк, Ян Марынін, Данііл Каско (усе - "Цмокі-Мінск"), Кірыл Сітнік ("Дынама", Уладзівасток, Расія), Максім Салаш ("Сан-Пабла Бургас", Іспанія).
У пятніцу, 25 лютага, баскетбалісты Беларусі і Вялікабрытаніі сустрэнуцца на пляцоўцы мінскага Палаца спорту, а 28 лютага згуляюць у Ньюкасле. Да гэтага абодва сапернікі правялі па два паядынкі ў кваліфікацыйнай групе В. Беларусы выйгралі ў Мінску ў каманды Турцыі - 84:70, а потым у Салоніках уступілі грэкам - 67:77. Брытанцы спачатку перамаглі ў сябе дома грэчаскіх баскетбалістаў - 78:69, а потым пацярпелі гасцявое паражэнне ад туркаў - 67:84.
У наступны раўнд адборачнага турніру трапяць па тры лепшыя каманды з васьмі кваліфікацыйных квартэтаў. У выніку пуцёўкі на чэмпіянат свету заваююць 12 прадстаўнікоў Старога Свету.
Фінальны этап 19-га мужчынскага планетарнага баскетбольнага форуму пройдзе з 25 жніўня па 10 верасня 2023 года на арэнах Японіі, Інданезіі і Філіпін. У ім прымуць удзел 32 каманды з усіх кантынентаў.-0-
