22 сакавіка, Мінск /Кар. БЕЛТА/. У Ханты-Мансійску завяршыўся адкрыты чэмпіянат Расіі па лыжных гонках і біятлоне сярод асоб з пашкоджаннем апорна-рухальнага апарату, паведамляе карэспандэнт БЕЛТА.
На спаборніцтвах у сталіцы Югры выступілі больш за 100 мацнейшых лыжнікаў і біятланістаў з 15 рэгіёнаў Расіі, таксама ўдзел у турніры прынялі прадстаўнікі Беларусі. Спартсмены разыгрывалі медалі ў шасці дысцыплінах (па тры ў лыжных гонках і біятлоне). За шэсць дзён спаборніцтваў нашы атлеты заваявалі пяць узнагарод: тры залатыя і дзве сярэбраныя.
Трохразовай пераможцай чэмпіянату ў класе LW10-12 (сядзячыя спартсмены-калясачнікі) стала беларуска Валянціна Шыц - нашай лыжніцы не было роўных на дыстанцыях 2,5 км, 10 км, а таксама ў спрынце. Двойчы на подыум турніру ў Ханты-Мансійску падымалася Лідзія Лобан: беларуска фінішавала другой у лыжным спрынце і выйграла серабро біятлоннай індывідуальнай гонкі на 12,5 км (клас LW10-12).
23 сакавіка ў Іжэўску стартуе адкрыты чэмпіянат Расіі па лыжных гонках і біятлоне сярод атлетаў з парушэннямі зроку, у якім таксама прымуць удзел беларускія спартсмены.-0-
