7 лютага, Мінск /Кар. БЕЛТА/. Беларускі выступяць на першым у новым сезоне этапе Гран-пры па мастацкай гімнастыцы ў Маскве, паведамілі карэспандэнту БЕЛТА ў прэс-службе Беларускай асацыяцыі гімнастыкі.
Старт у Лужніках збярэ лепшых гімнастак з 37 краін. Беларусь прадставяць Настасся Салас і каманда ў групавых практыкаваннях. Яшчэ адна беларуска Аліна Гарнасько выступіць у міжнародных спаборніцтвах, якія будуць праходзіць паралельна турніру Гран-пры.
Сёння спартсменак чакаюць кваліфікацыйныя старты. У суботу спаборніцтвы па праграме мнагабор'я прадоўжацца. У нядзелю спартсменкі разыграюць медалі ў асобных відах праграмы: практыкаваннях з мячом, булавамі, стужкай і абручом. У спаборніцтвах "групавічак" стануць вядомы медалісткі ў рабоце з пяццю мячамі, трыма абручамі і дзвюма парамі булаў. Завершыцца турнір гала-канцэртам.-0-