1 верасня, Мінск /Кар. БЕЛТА/. Беларускі плывец Ягар Шчалканаў спыніўся за крок ад сваёй другой узнагароды на Паралімпійскіх гульнях у Токіа, паведамляе карэспандэнт БЕЛТА.
Сёння ў фінальным заплыве на дыстанцыі 200 м брасам (клас SM9) беларускі плывец заняў чацвёртае месца, паказаўшы рэзультат 2 мін. 18,40 сек. Пераможцам у гэтай дысцыпліне аказаўся расійскі плывец Андрэй Каліна (2 мін. 14,90 сек.). Да гэтага Ягор Шчалканаў на такійскай Паралімпіядзе стаў уладальнікам сярэбранага медаля на стаметроўцы ў плаванні на спіне.
Таксама сёння ў алімпійскім аквацэнтры японскай сталіцы выступяць пяціразовы чэмпіён Токіа Ігар Бокій, Уладзімір Ізотаў і Настасся Зудзілава. Акрамя таго, беларус Уладзіслаў Грыб паспаборнічае за ўзнагароды ў сектары для кідання булавы.
Цяпер у скарбонцы беларускіх паралімпійцаў 7 узнагарод: 5 залатых, якія заваяваў Ігар Бокій, серабро Ягора Шчалканава і бронза кап'якідальніцы Лізаветы Пятрэнка. У Токіа беларускія спартсмены выступаюць у пяці відах спорту.
На Паралімпіядзе-2016 у Рыа-дэ-Жанэйра беларусы заваявалі 10 узнагарод - 8 залатых і 2 бронзавыя, заняўшы 19-е месца ў агульнакамандным медальным заліку. Для беларускіх спартсменаў гэта сёмыя летнія Паралімпійскія гульні.
У спаборніцтвах у Токіа выступаюць каля 4 тыс. паралімпійцаў, якія прадстаўляюць больш за 160 краін свету. Яны разыгрываюць 539 камплектаў узнагарод у 22 відах спорту. Урачыстае закрыццё Гульняў адбудзецца 5 верасня.-0-
