3 кастрычніка, Мінск /Кар. БЕЛТА/. Жаночая маладзёжная зборная Беларусі па баскетболе 3х3 пераможна пачала выступленне на чэмпіянаце свету (U-23) у кітайскім Ланьчжоу, паведамляе карэспандэнт БЕЛТА.
У стартавым матчы папярэдняй групы А беларускі ўпэўнена перайгралі каманду Дамініканскай Рэспублікі з лікам 22:12. У складзе пераможніц дзевяць ачкоў набрала Арына Масько, па пяць балаў у актыве Настассі Сушчык і Наталлі Гарбачовай, у Ганны Лапо тры ачкі. У другім сённяшнім паядынку беларускія баскетбалісткі аказалі ўпартае супраціўленне расіянкам, але ўсё ж такі ўступілі з розніцай у тры ачкі - 12:15. У гэтай гульні Наталля Гарбачова і Арына Масько набралі па чатыры ачкі, Настасся Сушчык і Ганна Масько - па два. У мінулым годзе на маладзёжным чэмпіянаце свету беларускі сустракаліся з расіянкамі ў чвэрцьфінале і прайгралі 15:19. Пасля гэтага каманда Расіі дабралася да фіналу і заваявала залатыя медалі, а беларускі апынуліся на 5-й падагульняючай пазіцыі.
Заўтра падапечныя Юрыя Ваўка правядуць два заключныя матчы папярэдняга этапу - супраць баскетбалістак Інданезіі і Чэхіі. Сёння інданезійкі прайгралі дамініканкам (16:19) і чэшкам (11:21). Чэшскія ж спартсменкі ў паядынку з расіянкамі доўгі час выйгравалі, але ў канцоўцы не ўтрымалі сваю перавагу і ўступілі з лікам 18:20.
Пасля завяршэння групавога этапу барацьбу за ўзнагароды прадоўжаць па дзве лепшыя каманды з чатырох папярэдніх квартэтаў. У час сусветнага першынства таксама пройдуць індывідуальныя спаборніцтвы па кідках з далёкай дыстанцыі і конкурс баскетбольнага майстэрства. Маладзёжны планетарны форум завершыцца 6 кастрычніка.-0-