27 чэрвеня, Мінск /Кар. БЕЛТА/. Беларускія спартсменкі не змаглі прабіцца ў фінал спаборніцтваў па кулявой стральбе на II Еўрапейскіх гульнях, паведамляе карэспандэнт БЕЛТА.
Сёння ў кваліфікацыйным раўндзе турніру па стральбе з малакалібернай вінтоўкі з трох становішчаў на 50 м беларуска Марыя Мартынава набрала 1158 балаў і заняла 15-е месца. Яе сяброўка па камандзе Святлана Шчарбацэвіч з рэзультатам 1144 бала апынулася на 36-й пазіцыі сярод 39 удзельніц спаборніцтваў. За ўзнагароды паспрачаюцца восем спартсменак.
Учора ў гэтым відзе мужчынскіх спаборніцтваў сярэбраным прызёрам стаў беларус Юрый Шчарбацэвіч. Пакуль гэта адзіная ўзнагарода беларускіх стралкоў на II Еўрапейскіх гульнях.
Спаборніцтвы майстроў кулявой стральбы ў ціры імя маршала С.Цімашэнкі завершацца 28 чэрвеня турнірам змешаных каманд у стральбе з малакалібернага пісталета на 25 м. Беларусь прадставяць два дуэты - Вікторыя Чайка / Абдул-Азіз Курдзі і Кацярына Кручанок / Яўген Зайчык.-0-
