15 верасня, Мінск /Кар. БЕЛТА/. У Рэспубліканскім цэнтры алімпійскай падрыхтоўкі па зімовых відах спорту "Раўбічы" стартаваў другі летні этап Кубка Садружнасці па біятлоне, паведамляе карэспандэнт БЕЛТА.
Праграму спаборніцтваў на лыжаролернай трасе ў "Раўбічах" адкрыў жаночы спрынт. Увесь п'едэстал па выніках гонкі занялі расіянкі: перамогу атрымала Наталля Гербулава, услед за ёй размясціліся Кацярына Наскова і Тамара Дзербушава. Лепшай з нашых дзяўчат стала Дзінара Алімбекава, якая паказала 5-ы рэзультат пры двух штрафных кругах, прайграўшы пераможцы 52,3 сек. Іншыя беларускі ў топ-10 не трапілі: Адэліна Сабітава стала 13-й, Юлія Кавалеўская - 18-я, Ірына Кручынкіна - 19-я, Аліна Зайцава - 22-я, Лідзія Надольская - 24-я, Вікторыя Хадасевіч заняла апошняе 25-е месца.
Старт мужчынскаму спрынту будзе дадзены ў 14.00, беларускую каманду прадставяць 13 спартсменаў. Іван Тулацін пабяжыць у гонку пад 2-м стартавым нумарам, таксама выступяць Дзмітрый Лазоўскі (3), Антон Смольскі (4), Павел Бялько (8), Максім Варабей (12), Раман Ялётнаў (13), Мікіта Лабастаў (14), Сцяпан Данілаў (17), Ілья Аўсеенка (19), Аляксандр Кошын (20), Аляксей Логвінаў (24), Аляксандр Петухоў (31) і Дзяніс Яромаў (32). У суботу на спаборніцтвах у "Раўбічах" пройдуць гонкі праследавання, 18 верасня адбудуцца мас-старты.
Першыя гонкі ў рамках Кубка Садружнасці на снежных трасах пройдуць з 22 па 25 снежня ў Разанскай вобласці - навагоднія гонкі стануць трэцім этапам турніру. У другой палавіне студзеня два этапы запар зноў пройдуць у "Раўбічах", а заключная шостая стадыя Кубка будзе праведзена ў сакавіку ў Цюмені.-0-
