Сцяг Чацвер, 28 сакавіка 2024
Усе навіны
Усе навіны
Спорт
02 верасня 2022, 09:09

Беларуская тэнісістка Арына Сабаленка прабілася ў 3-і раўнд US Open

2 верасня, Мінск /Кар. БЕЛТА/. Шостая ракетка планеты беларуска Арына Сабаленка атрымала другую перамогу на адкрытым чэмпіянаце ЗША па тэнісе, які праходзіць у Нью-Ёрку, паведамляе карэспандэнт БЕЛТА.

У трохсэтавым матчы другога раўнда лепшая беларуская тэнісістка з вялікай цяжкасцю перамагла эстонку Каю Канепі, якая займае 34-е месца ў сусветным рэйтынгу. Прайграўшы першую партыю з лікам 2:6, Сабаленка ў другім сэце была на мяжы паражэння, уступаючы 1:5, аднак змагла змяніць ход матчу і справа дайшла да тай-брэйка. У ім эстонка двойчы была за крок ад перамогі, ведучы 7:6 і 8:6, але беларуска зноў праявіла байцоўскі характар і вырвала перамогу - 10:8. У вырашальнай партыі Арына Сабаленка змагла даціснуць саперніцу і перамагла - 6:4. Сустрэча прадаўжалася 2 гадзіны 20 мінут.

На старце апошняга ў гэтым сезоне турніру серыі "Вялікага шлема" Арына Сабаленка ўпэўнена абыграла амерыканскую тэнісістку Кэтрын Харысан (243-і нумар сусветнага рэйтынгу) - 6:1, 6:3. Наступнай саперніцай Сабаленка будзе францужанка Клара Бюрэль (131).

У 1/16 фіналу выйшла і экс-першая ракетка свету Вікторыя Азаранка (26), якая ў другім крузе перамагла ўкраінку Марту Касцюк (65) - 6:2, 6:3. У першым раўндзе Азаранка перайграла амерыканку Эшлі Кругер (244) - 6:1, 4:6, 6:2. Цяпер беларуску чакае сустрэча з харваткай Петрай Марціч (54).

Аляксандра Сасновіч (32) прайграла ў 1/32 фіналу амерыканскай тэнісістцы Джэсіцы Пегуле (8) - 4:6, 4:6. На старце беларуска перамагла італьянку Элізабету Качарэта (99) - 6:2, 6:4.

У другім раўндзе мужчынскага адзіночнага разраду беларускі тэнісіст Ілья Івашка (73) за тры гадзіны ўзяў верх над дзясятым нумарам рэйтынгу АТР палякам Хубертам Гуркачам - 6:4, 4:6, 7:6 (7:5), 6:3. У 1/16 фіналу беларус сустрэнецца з італьянцам Ларэнца Музеці (30). У першым паядынку Івашка перамог амерыканскага тэнісіста Сэма Куэры (287) - 4:6, 6:4, 7:6 (10:8), 6:3.

Агульны прызавы фонд адкрытага чэмпіянату ЗША складае $60 млн. Пераможцы ў мужчынскім і жаночым адзіночным разрадзе атрымаюць па $2,6 млн, фіналісты US Open-2022 атрымаюць па $1,3 млн. Спаборніцтвы на адкрытых хардавых кортах Нью-Ёрка завершацца 11 верасня.-0-

Падпісвайцеся на нас у
Twitter
Топ-навіны
Свежыя навіны Беларусі