18 сакавіка, Мінск /Кар. БЕЛТА/. Беларуска Дар'я Фядзьковіч заваявала другую асабістую ўзнагароду зімовых Гульняў паралімпійцаў "Мы разам. Спорт", якія праходзяць у Ханты-Мансійску, паведамляе карэспандэнт БЕЛТА.
Дар'я Фядзьковіч выйграла бронзу ў біятлонным спрынце на 6 км сярод спартсменак з пашкоджаннем апорна-рухальнага апарату ў класах LW 2-9 (стоячы). Напярэдадні Дар'я Фядзьковіч таксама стала трэцяй у лыжнай гонцы вольным стылем.
Што датычыцца вынікаў іншых беларускіх біятланістаў, то ў мужчынскім спрынце сярод сядзячых атлетаў (класы LW 10-12) Дзмітрый Лобан стаў чацвёртым, яго партнёр па камандзе Уладзіслаў Кандратаў заняў сёмае месца. У жаночых спаборніцтвах беларуска Лідзія Лобан і Кацярына Шасціна-Комар размясціліся на пятай і сёмай пазіцыях адпаведна.
У спрынце сярод атлетаў з парушэннямі зроку (класы В1-В3) беларус Васіль Шапцябой паказаў сёмы вынік, Мікіта Ладзесаў - восьмы. Яшчэ адзін прадстаўнік Беларусі Юрый Голуб сышоў з дыстанцыі.-0-