26 верасня, Мінск /Кар. БЕЛТА/. Беларуская тэнісістка Арына Сабаленка (20-ы нумар сусветнага рэйтынгу) выйшла ў чвэрцьфінал адзіночнага разраду на турніры ў кітайскім Ухані з прызавым фондам больш за $2,7 млн, паведамляе карэспандэнт БЕЛТА.
У паядынку 1/8 фіналу Арына Сабаленка сёння сустракалася з прадстаўніцай ЗША Сафіяй Кенін (62) і ўпэўнена выйграла першую партыю з лікам 6:3. Першы гейм другога сэта Арына прайграла, затым выйшла наперад (3:1) і ў выніку зноў перамагла 6:3. Да гэтага першая ракетка Беларусі перамагла іспанку Карлу Суарэс Навара (22) - 7:6, 2:6, 6:2, а таксама лепшую ўкраінскую тэнісістку Эліну Світоліну (6) - 6:4, 2:6, 6:1. Наступнай саперніцай Сабаленка будзе пераможца матчу паміж расіянкай Дар'яй Касаткінай (13) і славацкай тэнісісткай Дамінікай Цыбулкавай (31).
У парным разрадзе беларуска Лідзія Марозава і японка Сюко Ааяма прабіліся ў чвэрцьфінал.
На турніры ў Ташкенце беларуская тэнісістка Вера Лапко (64) у 1/8 фіналу абыграла сербку Івану Ёравіч (194) - 6:2, 6:4.-0-
