26 студзеня, Мінск /Кар. БЕЛТА/. Беларуская тэнісістка Арына Сабаленка ўпершыню стала фіналісткай турніру серыі "Вялікага шлема" - адкрытага чэмпіянату Аўстраліі, паведамляе карэспандэнт БЕЛТА.
Сёння ў другім паўфінальным матчы Australian Open пятая ракетка планеты перамагла польскую тэнісістку Магду Лінет (45-ы нумар рэйтынгу WTA) - 7:6 (7:1), 6:2. У гэтай гульні Арына Сабаленка 6 разоў падавала на вылет і дапусціла дзве двайныя памылкі на сваіх падачах. Сустрэча прадаўжалася 1 гадзіну 33 мінуты.
У вырашальным паядынку аўстралійскага першынства Сабаленка будзе сапернічаць з чэмпіёнкай Уімблдона-2022 прадстаўніцай Казахстана Аленай Рыбакінай (25), якая ў першым паўфінале абыграла двухразовую пераможцу Australian Open беларуску Вікторыю Азаранка (24) - 7:6 (7:4), 6:3. Азаранка выйгравала Australian Open у 2012 і 2013 гадах.
У мужчынскім адзіночным разрадзе паўфіналы адбудуцца заўтра. У першым з іх грэк Стэфанас Цыцыпас (4) згуляе з расіянінам Карэнам Хачанавым (20), а затым дзевяціразовы чэмпіён Australian Open сербскі тэнісіст Новак Джокавіч (5) будзе сапернічаць з амерыканцам Томі Полам (35).
Агульны прызавы фонд цяперашняга аўстралійскага першынства складае $51,5 млн. Пераможцы ў мужчынскім і жаночым адзіночных разрадах атрымаюць па $2 млн. Турнір на кортах "Мельбурн-Парка" фінішуе 29 студзеня.-0-
