24 сакавіка, Мінск /Кар. БЕЛТА/. Беларусь сумесна з партнёрамі вырашае пытанне правядзення альтэрнатыўных міжнародных спартыўных мерапрыемстваў. Аб гэтым заявіў міністр спорту і турызму Сяргей Кавальчук на нарадзе ў Прэзідэнта Беларусі аб выніках удзелу беларускіх спартсменаў у XXIV зімовых Алімпійскіх гульнях у Пекіне і перспектывах развіцця зімовых відаў спорту, перадае карэспандэнт БЕЛТА.
Міністр падкрэсліў, што спорт у сучасным свеце - гэта вялікая палітыка. І свет мяняецца вельмі хутка. "У такіх умовах - нядобразычлівасці, адкрытых спекуляцый - мы сумесна з нашымі партнёрамі вырашаем пытанне правядзення альтэрнатыўных міжнародных спартыўных мерапрыемстваў", - сказаў Сяргей Кавальчук.
"Улічваючы, што большасць краін-партнёраў уваходзіць у склад СНД, Шанхайскай арганізацыі супрацоўніцтва, мы разам з расійскімі калегамі пачалі прапрацоўку пытанняў прыцягнення да ўдзелу ў гэтых спартыўных мерапрыемствах такіх краін, як Кітай, Індыя, Пакістан, Манголія і іншыя", - прадоўжыў кіраўнік Мінспорту і турызму. Ён лічыць магчымым таксама запрасіць дружалюбныя краіны Паўднёвай Амерыкі. Магчыма таксама правядзенне гульняў краін БРІКС (Бразілія, Расія, Індыя, Кітай і ПАР).
На думку міністра, правядзенне такіх мерапрыемстваў будзе з'яўляцца не толькі адным са значных рычагоў папулярызацыі здаровага ладу жыцця сярод грамадзян, але і дасць магчымасць эфектыўна выкарыстоўваць і развіваць існуючую спартыўную інфраструктуру, у тым ліку і ў рэгіёнах.
Прыкладам такіх мерапрыемстваў стануць другія гульні краін СНД, якія пройдуць у 2023 годзе ў Беларусі. Як адзначыў Сяргей Кавальчук, ужо гучаць прапановы праводзіць гэта мерапрыемства штогод.
У бліжэйшыя дні пройдуць сустрэчы з прадстаўнікамі алімпійскага камітэта Расіі і НАК Беларусі, міністэрстваў спорту абедзвюх краін, спартыўных федэрацый, а потым і калегія для арганізацыі спартыўнай дзейнасці на бліжэйшую перспектыву.
"Спорт, на жаль, не дае адразу вынікаў. Гэта праца і цярпенне. Мы бачым слабыя месцы і разумеем, як трэба выбудоўваць падрыхтоўку, дзе трэба яшчэ дапрацаваць", - запэўніў Сяргей Кавальчук.-0-
